!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Бурна биографија на „боемот“ Борис Трајков, обвинет за проневера во Мелбурн


Мелбурн, 18 октомври, 2017 - 15:08 (META) 

Медиум на македонски јазик во Австралија, Борис Трајков го нарекува „боем“ и „плејбој“. Австралиската државна телевизија „Еј-би-си“, пак, со него се занимава како осомничен за проневери вредни милиони австралиски долари, како човек уапсен во јануари годинава поради одгледување значителни количества марихуана, како човек што крадел струја додека бил пуштен на слобода со кауција… Австралискиот новинар со македонско потекло, Саша Узунов, пак, на својот блог подолго време наназад вади по некој интересен детаљ и Трајков го нарекува „соработник на пројугословенските структури во тогашна Социјалистичка Република Македонија и тогашна СФРЈ“.

Поранешниот новинар Борис Трајков (76) вчера го привлече вниманието на јавноста во Република Македонија и на Македонците низ светот поради судскиот процес за проневера на пари од Викториската мултиетничка славјанска добротворна асоцијација (Victorian Multiethnic Slavic Welfare Association), која им помагала на остарените мигранти од просторите на поранешна Југославија, а раководела и со детска градинка во мелбурнското предградие Лелор. Таа завршува во стечај во 2016 година и оттогаш почнува да се расплеткува клопчето кое стасува до 3,5 милиони австралиски долари на кои им се губи трагата.

Според тоа што го пренесува веб-страницата на австралиската „Еј-би-си“, во текстот за обвинението против Борис Трајков во февруари годинава, тој и неговата сопруга се доселиле во Австралија во 1967 година и тој набргу станува интересен за АСИО – австралиската тајна служба за контраразузнавање. Во неговото досие, отворено од контраразузнавачите во 1971 година, потоа се додадени и различни полициски документи од претходниот период, кои зборуваат за негово активирање на полето на криминалот.

Така, една полициска белешка од 1968 година содржи наводи дека во неговото кафуле се одвива нелегално коцкање. Друга белешка од полицијата на сојузната држава Викторија од 1969 година вели дека во неговото кафуле „чести гости се крадци и бандити“, а за Трајков се вели дека е без работа и во неговиот локал прибира личности со сомнителен морал.

Неговиот интерес за угостителството не запира, па го отвора ресторанот „Голден грил“, а во поново време тој е сопственик во сенка на ресторанот „Њу Јуроп“ во мелбурншкото северно предградие Престон, каде што многу често има настапи на музичари и на групи од Македонија. Во октомври 2015 година, двајца членови на мотоциклистичката банда Команчерос испукале два куршума во плафонот на ресторанот, кој пак минатата година беше опожарен.

Според „Еј-би-си“, на Борис Трајков му се закануваат и други обвиненија, вклучувајќи стекнување имот со измама, користење лажни документи при аплицирање за кредитни картички во август минатата година, а исто така на суд било посведочено дека двапати на полицајците им се претставувал со лажен идентитет кога бил испрашуван поради неговото возење.

Тој, инаку, бил цел на АСИО во седумдесетите и во осумдесетите години на минатиот век поради неговите блиски врски со југословенските дипломати. Од 1975 година до 2000 година бил спикер и новинар на австралиското државно мултиетничко радио „Си-би-ес“.

 


Македонец од Мелбурн потрошил 300.000 долари од донации на алкохол и на долна облека


Мелбурн, 17 октомври, 2017 - 16:03 (META) 

Пензионерот Борис Трајков (76), поранешен новинар во македонската редакција на австралиското државно радио за националностите „Си-би-ес“, заврши на суд и мора да враќа околу милион австралиски долари, под обвинение дека проневерувал пари, јави австралиската државна телевизија „Еј-би-си“.

Трајков, кој во 1991 година го добил одликувањето Редот на Австралија за неговата работа за македонската заедница во Австралија, според наводите, потрошил 300.000 долари на алкохол, долна облека и на други потреби. Парите му биле давани за добротворни цели или како надомест за грижа за децата во детска градинка што ја раководел.

Борис Трајков е еден од основачите на Викториската мултиетничка славјанска добротворна асоцијација (Victorian Multiethnic Slavic Welfare Association), која им помагала на остарените мигранти од просторите на поранешна Југославија. Асоцијацијата раководела и детска градинка во мелбурнското предградие Лелор. Родителите му плаќале месечен надомест на Трајков во кеш.

Во Обласниот суд каде се одвива процесот за стечајната постапка, биле изнесени и тврдењата дека од 2013 до 2016 година Трајков примил 1,5 милиони долари во готово од родителите на згрижените деца, а на банковата сметка на асоцијацијата во тој период биле уплатени само 56.000 долари.

Било утврдено дека со парите од асоцијација поранешниот новинар на македонската редакција на „Си-би-ес“ купувал цигари и алкохол. Во исто време, вработените во градинката не добивале плата.

Во трите години за кои се врши истрага, Трајков купил алкохол вреден 44.890 долари за ресторанот на неговата ќерка во населбата Престон.

Во истиот период потрошил повеќе од 150.000 долари од фондовите на асоцијацијата за дизајнерска облека, долна облека и за накит, а потрошил 45.000 долари за летови меѓу Мелбурн и Сиднеј и за хотелско сместување. Трајков исто така префрлил 190.000 долари на сметката на неговата сопруга Слободанка.

Поранешниот новинар пред судот тврдел дека подоцна од свој џеб ги покрил сите трошоци за неговите приватни потреби.

Според текст од австралискиот новинар од македонско потекло, Саша Узунов, Трајков во Австралија се доселил во 1967 година, а во „Си-би-ес“ работел од 1975 до 2000 година.


Македонски Австралиец убиен во ресторан во Мелбурн, напаѓачите избегале


Мелбурн, 9 септември, 2017 - 20:16 (META) 

Дени Димовски (31) е избоден до смрт во тепачка на забава во еден ресторан во западниот дел на Мелбурн, Австралија, јавуваат австралиските медиуми.

Несреќниот настан се случил во ресторанот „Корзо грил“ во Каролин Спрингс, во раните утрински часови во саботата. Полицијата соопшти дека групата избегала од местото на настанот. Групата заминала пеш од македонскиот ресторан откако жртвата била прободена неколкупати, но се верувало дека имало неколку автомобили во близина.

Димовски починал веднаш откако бил пренесен во болница.

Сопствениците на ресторанот, Џим и Јасмина Рибаровски, изјавиле дека Димовски бил редовен гостин во нивниот ресторан.


Авион се урна во трговски центар во Мелбурн, пет лица загинаа


Мелбурн, 21 февруари, 2017 - 10:29 (META) 

Мал авион „бичкрафт“, во кој имало пет лица, се урна во трговски центар во близина на аеродромот „Есендон“ во Мелбурн.

Агенцијата АФП пренесе дека од местото каде што се урнал авионот се издигнува густ црн чад. Трговскиот центар не бил отворен кога се случила несреќата.

Австралиските власти не го соопштуваат точниот број на загинати, но потврдија дека во леталото што полетало од „Есендон“ кон островот Кинг имало пет лица.


Резолуција на Македонците од Мелбурн до претседателот Иванов


Мелбурн, 24 јануари, 2017 - 17:11 (META) 

Македонците од Мелбурн и од Викторија денеска испратија резолуција до претседателот на Македонија, Ѓорге Иванов, во која се наведува дека со голема загриженост ја следат политичката постизборна состојба во Македонија затоа што наместо решение за политичката криза, земјата навлегува во подлабока и неизвесна политичка иднина.

„Бараме од Вас безусловно да го штитите и да го спроведувате Уставот на Република Македонија, кој е лицето и стремежот на македонскиот народ низ вековите наназад. Бараме целосно да се отфрли албанското малцинство да биде државотворен народ на Македонија, албанскиот да биде втор официјален јазик на Македонија, каков било разговор за грбот, химната, знамето и за името на Македонија“, се вели во резолуцијата.

Македонците од Мелбурн бараат итно да се спроведе попис на населението на Македонија и во иднина да се прекинат какви било договори со странски олеснувачи или амбасадори на држави во Република Македонија.

Тие искажуваат жалење што двете водечки македонски политички партии, ВМРО-ДПМНЕ и СДСМ, со освоени 100 пратенички мандати, од 120, не можат да најдат заедничко национално решение што ќе ги обележи и зацврсти македонските национални интереси.


Владиката Петар, во Мелбурн, повикан на разговор во полиција


Мелбурн, 17 август, 2016 - 12:30 (META) 

Надлежниот митрополит на Австралиско-новозеландската епархија, Владиката Петар утрово бил приведен и повикан на информативен разговор во полицијата во Мелбурн, пренесе Религија.мк.

Двајца детективи од одделот за криминологија на полицијата во Викторија го посетиле домот каде престојува владиката, а по краток разговор го повикале во полициска станица.

Од МПЦ засега нема никаков коментар и официјален став. За веста слушнале од медиумите, но додека не добијат официјална потврда не сакаат да даваат какви било коментари.


Балкански фестивал на народни песни и игри во Охрид


Охрид, 7 јули, 2016 - 11:36 (META) 

Од денеска па сè до 10 јули, на отворената сцена Долни сарај во Охрид ќе се одржува јубилејното, 55. издание на Балканскиот фестивал на народни песни и игри.

Свеченото отворање ќе биде со настап на „Танец“, со почеток во 21 часот.

На 8 јули, настап ќе има ансамблот „Александар Трети Македонски“ од Мелбурн – Австралија, како и ансамблот „Гоце Делчев“ од Битола.

На 9 јули настап ќе имаат ансамбл од Турција, ансамблот „Китка“ од Истибање, Македонија, и ансамблот „Македонски бисери“ од Австралија.

Директорот на Ансамблот за народни песни и игри на Македонија „Танец“, Зоран Џорлев, вели дека годинава на фестивалот ќе бидат „вратени“ некои народни ора, кои публиката ги бара.

Затворањето на фестивалот ќе биде в недела, на 10 јули, со настапот на ансамблот „Пловдив“ од Бугарија, ансамблот „Искра“ од Црна Гора и на КУД „Отексфолк“ од Охрид.


Пожар во македонската црква „Свети Никола“ во Мелбурн


Мелбурн, 30 јануари, 2016 - 11:28 (META) 

Во македонската црква „Свети Никола“ во Престон, Мелбурн, Австралија, денеска во 12.30 часот по австралиско време избил пожар. Причинета е материјална штета, а повредени нема, пишува „Фаланга“.

Пожарот, според зборовите на член од противпожаната служба, почнал од струјомерот во црковната зграда.

Во моментот кога почнал пожарот, на првиот кат престојувал монахот Никодим Солунчев и спас од огнената стихија побарал преку прозорецот, па скокнал во рацете на неколку полицајци кои се нашле таму во тој момент.

Пожарот е изгаснат и според процените, причинета е материјална штета која надминува 100.000 долари.


Македонците од Австралија собраа 90.000 австралиски долари за поплавените во Македонија


Мелбурн, 20 март, 2015 - 15:15 (META) 

На донаторската акција во организација на Амбасадата на Македонија во Канбера и на Генералниот конзулат во Мелбурн за поплавените подрачја во Република Македонија, собрани се околу 90.000 австралиски долари.

Како што соопштија од македонскиот конзулат во Мелбурн, во акцијата иницирана од неколку македонски иселеници, со свои прилози на посебната сметка за донации се вклучија сите здруженија, клубови и индивидуални лица. Спроведена е со координација на дипломатско-конзуларните претставништва на Република Македонија во Австралија, а се реализира преку голем број културни и спортски настани, донаторски вечери и медиумска промоција во сите поголеми градови каде живеат Македонците.

Според амбасадорот Веле Трпевски, освен сумата која е собрана, многу е значајно да се истакне дека по повеќе години на поделби, недоразбирања и на недоверба, македонската заедница се обедини околу една кауза, една хуманитарна цел, во која се вклучија повеќе од 90 проценти од сите здруженија, клубови и медиуми на македонски јазик во Австралија.


Алонсо нема да вози во Мелбурн


Мелбурн, 3 март, 2015 - 15:50 (META) 

Фернандо Алонсо нема да вози на првата трка од новата сезона во Формула 1 во Мелбурн, а на негово место во болидод ќе седне тест-возачот Кевин Магнусен, соопштија од Мекларен-Хонда.
Докторите во Шпанија не востановиле никаква повреда, ниту потрес на мозокот, но тие му препорачале и понатаму да мирува бидејќи останал без свест при излетувањето во Барселона на 22 февруари.

Според соопштението за медиумите, и покрај тоа што докторите во Шпанија не востановија никаква повреда, ниту потрес на мозокот, тој вчера бил подложен на нова серија тестови и снимања, со што бил ослободен како без симптоми за некој проблем, но фактот дека останал без свест, упатува на понатамошно мирување.

Новиот шампионат во Формула 1 почнува на 15 март со трката за Големата награда на Австралија, а според најавите, Алонсо треба да биде подготвен да седне во болидот на 29 март, на трката за Големата награда на Малезија во Сепанг.