Македонските иселеници во Австралија, собрани околу охридското социјално друштво „Св. Наум Охридски“, со седиште во Мелбурн, направија хуман гест, организирајќи божикен ручек за згрижените лица во Одделението за геријатрија при Општа болница во Охрид.
Тие поминаа неколку убави часови во празнична и весела атмосфера, додека за убавото расположение придонесоа и членовите на ансамблот „Билјана јуниор“, кои ги пееја познатите староградски рефрени и кои ги посетија и оние згрижени лица кои не беа во можност да ги напуштат своите соби.
– И претходно, неколкупати, иселениците донирале ортопедски помагала за одделението, душеци, чаршафи, машина за перење алишта, собраа средства за реновирање на дел од собите каде беше поставен ламинат – вели за „Охрид њуз“, Лазар Стојчески, вработен во одделението.
На згрижените лица телефонски, од Мелбурн, им се обрати претседателот на друштвото „Св. Наум Охридски“, Васко Ангелески, кој им посака добро здравје и уште многу години да се слави празникот. Тој искажа благодарност кон персоналот на геријатриското одделение, но и кон триесетината донатори, Македонци и Албанци, членови и активисти на социјалното друштво од Мелбурн, Австралија.
Оттаму, истовремено, најавија донации и во наредниот период, меѓу кои ќе биде и реновирањето и изградбата на уште 50 соби и апартмани за потребите на охридското одделение, инвестиција која би се реализирала со заеднички средства на членовите на сите македонски здруженија во Мелбурн, Австралија.
