Парите од Владата нема да ги деблокираат сите општини?


Берово, 3 декември, 2018 - 13:44 (META) 

Донесувањето на законот со кој се обезбедуваат околу 50 милиони евра владини пари за општините, во блокираните општини донесе надеж дека конечно ќе успеат да се ослободат долговите таложени со години, но и прашања дали ќе успеат во тоа. Четири од 11 општини во Источна Македонија – Делчево, Берово, Зрновци и Пехчево се уште работат со блокирани сметки и определен месечен лимит.

Општина Берово е првата општина која објави јавен повик со кој ги повикува доверителите да ги пријават побарувањата. Во преговорите ќе бараат отпис од каматите и 15 отсто од долгот. Фирмите-доверители што ќе го прифатат тоа, според одредбите од законот, ќе имаат предност во склучувањето на договорите.

Меѓутоа, уште во старт наишле на првични проблеми. Главниот доверител на Општина Берово е АДГ „Пелагонија“ од Скопје во стечај, кому општината му должи половина милион евра. Тоа е и половина од вкупниот долг. Градоначалникот Звонко Пекевски вели дека преговорите ќе треба да ги води не со еден, туку со повеќе субјекти, кои се во Одборот на доверители на АДГ „Пелагонија“.

-Преговорите сè уште не сме ги почнале официјално, но имаме сложена работа, бидејќи во прашање се интересите на повеќе компании во Одборот на доверители на „Пелагонија“ – вели Пекевски.

Берово ќе добие 47,8 милиони денари од Буџетот.

Некои од градоначалниците на општините веќе имале првични неофицијални разговори, меѓутоа наишле на различни реакции. Сметаат дека перспективите во тие преговори ќе зависат од тоа дали компаниите сакаат итно и по секоја цена да ги наплатат долговите. Има и такви компании, велат градоначалниците,  кои не сакаат да се откажат од ништо што им следува  со закон. Дел од нив имаат и извршни решенија од суд.

Општина Пехчево деновиве ќе објави повик до доверителите. Најголемиот доверител е компанијата „Конти хидропласт“, која работела на изградба на водовод.

– Сè уште не сме разговарале со оваа компанија, но имаме и други доверители, кои очекуваме да се пријават на повикот. Парите од државниот буџет може да бидат основа за деблокада на сметката, но има уште да се враќа, бидејќи претходните градоначалници прекумерно ја здолжиле општината – изјави Драган Тренчовски, градоначалник на Општина Пехчево, која добива 62,4 милиони денари од државниот буџет.

Законот за финансиска поддршка на општините што беше донесен на крајот на октомври, наиде на различни реакции. Задолжителните и блокирани општини сметаат дека финансиската помош е добредојдена, бидејќи и по една година, новите градоначалници не успеаваат да ги одблокираат сметките.

Дел од општините кои се во подобра финансиска кондиција се на став дека со законот, централната власт упатува порака на толеранција на расипништвото и непочитување на правото.

Министерот за финансии Драган Тевдовски, законот го оправда со зборовите „општините знаат дека нема втор пат да има ваква мерка“.


Мираковска: Се создаде законска можност да се отпишат долговите на граѓаните


Скопје, 28 ноември, 2018 - 14:35 (META) 

Пратеничката од парламентарното мнозинство предводено од СДСМ и коалицијата, Соња Мираковска денеска информираше дека со усвојувањето на Законот за отпишување на камата на долгови, создадена е можноста да се отпишат долговите кои со години ги мачат илјадници семејства во Македонија.

– Ова финансиско олеснување за граѓаните е конечно решение за граѓаните кои од 2011 година се соочуваат со огромни долгови по основ на камати за предмети, за кои не биле свесни ниту дека постојат, кога извршните предмети од судовите се пренесени кај нотарите, а потоа тие завршија кај извршителите. Покрај отписот на затезната односно казнената камата, која се однесува на главниот долг и на трошоците на постапката за комунални дејности, електрична, топлинска енергија, вода и смет, телефонија, мобилни и кабелски оператори, одржување на заеднички простории, наводнување и одводнување на земјоделско земјиште, во Законот постои можност и за отпишување на каматите и за долговите за телевизија – рече Мираковска.

Таа додаде дека истовремено со законското решение се намалуваат и трошоците на постапката, кои не можат да бидат повисоки од 20 проценти од нивните предјавени и утврдени трошоци.

– Се намалува и надоместокот што должниците го плаќаат на извршителите, нотарите и адвокатите за овие предмети.Право на отпис на камата ќе може да оствари секој граѓанин должник, кој ќе го плати главниот долг и трошоците на постапката во рок од 12 месеци откако доверителите ќе донесат одлука за отпишување на каматите за наплата на долговите. Ваква Одлука доверителите се должни да донесат во рок од 10 дена од стапувањето на сила на овој Закон – додаде таа.


Владата ги „наградува“ општините што неодговорно се задолжувале


Скопје, 8 ноември, 2018 - 10:20 (META) 

Одлуката на Владата за подмирување на половина од неизмирените обврски на општините со пари од државната каса е проблематична, бидејќи во суштина со парите на граѓаните се плаќа неодговорното работење на општинските власти, наместо тие пари да се искористат за нови проекти.  Додека властите велат дека ова е значајна поддршка за општините, експертите се спротивставуваат, велејќи дека со оваа мерка се дава порака дека се покриваат незаконските дејствија, неодговорното работење и недостатокот на отчетност, пишува „Порталб“.

За одлуката на централната власт, наместо за нови проекти кои ќе ја подобрат состојбата во патиштата, здравството, образованието, животната средина и другите области со витална важност за граѓаните, да се покриваат долговите, упатените во проблематиката велат дека најпрвин треба да се изврши анализа и проценка за тоа кој и како се задолжувал.

Експертите и граѓанските организации бараат прецизно да се посочат имињата на тие што се задолжувале.

– Стопанските субјекти се изложуваат на некоректно и дискриминирачко дејствување од државата. Се создаваат трговски девијации во пазарот на капитал. Ваквиот инструмент дава порака во насока на синдикализирање на расходувањата од неодговорното работење на избраните и именуваните функционери. Кога ќе се синдикализира трошењето од неосигурани ризици, се создава неодговорност (moral hazard). Во суштина, свесни дека ќе поминат неказнети за неодговорното работење со даночните средства на граѓаните, се создава ситуација на недостиг од каква било грижа за управување со ризици, во согласност со можностите и ресурсите на општините од страна на неодговорните градоначалници. Трошоците поради неодговорното работење во заробената држава паѓа на товар на тие кои не се виновни за неодговорност. Министерот да направи анализа во врска со тоа како се собирани долговите и да побара отчет, а за ова треба да се вклучи и Државниот завод за ревизија и Јавното обвинителство – велат од  Центарот за економски анализи (ЦЕА).

Невладините организации сметаат дека одлуката на Владата да ги подмири долговите на општините не е исправна, затоа што не е направена анализа во врска со тоа кој и на каков начин ги создал долговите, а велат и дека оваа мерка е штетна за граѓаните бидејќи втор пат им се нанесуваат финансиски штети.

Бардил Јашари и Аиво Орав

– Оваа одлука, иако на прв поглед остава добар и позитивен впечаток, за мене е проблематична од неколку аспекти, но најмногу поради тоа што некој донесува одлука нашите пари (на граѓаните) да ги користи за покривање и на одреден начин и да ги награди лошите управители на општините. Исто така, без да се направат оценки за тоа на каков начин се направени долговите во општините, не може да се носи таква одлука, особено кога, само како пример, се знае дека по општините имаме повеќекратно поголем број на вработени отколку што имаат потреба, и дека ова несомнено предизвикува бескорисни трошоци, кои сега треба да се покријат со парите на граѓаните наместо тие средства да се искористат за проекти и суштински потреби за жителите, како училишта, болници, патна инфраструктура и т.н. Одлуката беше нетранспарентна и донесена без неопходни консултации со граѓаните и невладините организации. Барем да објавеа детали и рационални причини за една ваква одлука – вели директорот на Фондацијата „Метаморфозис“, Бардил Јашари.

Активистот Арианит Џафери од „Еко Герила“, бара на  оние што ги направиле долговите да им се конфискуваат имотите и парите потоа да се вратат кај граѓаните. Во спротивно, подмирувањето на долговите ќе биде бесмислено, вели тој.

Arianit

– Не е лошо што Владата планира да подмири половина од општинските долгови, но истовремено треба да се извршат ревизии и да се спроведат истраги за да се открие во какви околности се создадени тие долгови, од кои причини, односно кога и од кого, и да се повикаат на одговорност пред органите на правдата градоначалниците кои ги направиле тие долгови. Виновниците за создадените долгови треба да се казнат и да ги вратат парите сразмерно на висината на долгот, исто така преку конфискување на нивните приватни имоти, доколку е потребно. Граѓаните еднаш биле оштетени кога се создал долгот, сега по втор пат се оштетува нивниот личен буџет со нивно подмирување, додека виновниците продолжуваат да имаат слобода да злоупотребуваат уште повеќе во иднина. Ако не им се даде добра лекција, џабе ќе се подмират долговите, без разлика на нивниот износ – вели Џафери.

Операцијата за подмирување на долговите на општините официјално ќе започне со носењето на ребалансот на буџетот. Според објавените пресметки, ќе се доделат безмалку 50 милиони евра, со кои ќе треба да се покријат 51 отсто од долговите на општините. Вкупниот долг што го имаат пријавено локалните самоуправи, до крајот на месец септември, достигнува 81,3 милиони евра.

– Финансиската помош од 51 проценти од вкупниот износ е сериозна помош. На јасен начин создаваме механизам за спречување на акумулирање на долговите во иднина и јасно тврдиме по втор пат немаме намера да направиме вакво нешто и тоа нема да се случи. Сега има простор да се помогне, во овој момент го решаваме проблемот со долгот – рече министерот за финансии, Драган Тевдовски.

Парите од централниот буџет кои ќе завршат во општинските сметки ќе бидат со стриктна намена и неповратни. Општините очекуваат од Владата да се дадат упатства за дејствување.

Министерот за локална самоуправа, Сухејл Фазлиу, најави дополнителни механизми за контрола на локално ниво со цел спречување на создавање на долгови.

– Како системско решение, општините не треба да влегуваат во нови долгови, предвиден е контролен механизам во член 2 од Законот за финансирање на единиците на локалната самоуправа. Имено, општините можат да ги планираат приходите најмногу до 10 отсто од просекот на нивните приходи за последните три години – вели Фазлиу.


Поддржан и дополнет предлогот за отпис на каматите од долгови


Скопје, 12 октомври, 2018 - 15:04 (META) 

Собраниската Комисија за финансирање и буџет денеска едногласно даде поддршка за предлог законот за отпис на камати од долгови на граѓаните кон претпријатија кои извршуваат јавни и комунални услуги.

Комисијата ги дополни основите за отпис на камата и за радиодифузна такса, предлага донесување генерална одлука од оние кои имаат побарувања од граѓаните во рок од десет дена и намалување на трошоците кон нотарите, адвокатите и извршителите на 20 проценти.

Тоа е содржано во амандманските дополнувања на предлог-законот за отпишување камати за наплата на долгови кои произлегуваат од услуги од вршители на комунални дејности, телефонија, мобилни и кабловски оператори, одржување на заеднички простории, наводнување и одводнување на земјоделско земјиште, што ги усвои денеска собраниската Комисија за финансирање и буџет.

Измените на овој предлог закон, поднесен од пратениците и од опозицијата и од владејачките партии, произлегле од јавните расправи.

Со амандманите се предлага за отпис на камати да се важат и предмети кои се водат за долгови за радиодифизна такса, што било испуштено да се стави во предлогот поради тоа што таа е веќе укината. Исто така, се предвидува сите јавни претпријатија или приватни компании кои вршат вакви услуги да донесат генерални одлуки дали го прифаќаат отписот на камати за долгови што граѓаните ги имаат кон нив. Потоа граѓаните ќе можат во период од 12 месеци да го платат долгот и трошоците кон нотарите, адвокатите и извршителите, кои пак сега се намалуваат на 20 проценти, и потоа да им бидат деблокирани сметките доколку поради извршните решенија им биле блокирани.

Со предлог-законот се предвидува отпис на камати за долгови во период од 26 мај 2006 до јули 2011 година. Законот треба да почне да се применува по донесувањето, односно по објавувањето во Службен весник.

Законот за отпишување на камата за наплата на долгови, во прво читање Собранието го усвои кон крајот на јуни. На почетокот на септември расправата во второ читање на оваа комисија беше одложена за да се вградат предлозите што произлегле од јавните расправи.

Предложениот закон предвидува отпишување на каматата што се пресметува од поднесување на тужбата за присилна наплата на паричниот долг, до конечна исплата на паричното побарување.


ВМРО-ДПМНЕ: СДСМ го зголемува јавниот долг, а „остварува“ само партиски тендери


Скопје, 7 август, 2018 - 15:31 (META) 

Со денешното задолжување за околу 32,5 милиони преку аукцијата на Министерството за финансии, СДСМ продолжува со постојаното зголемување на јавниот долг, а не ги остварува дадените ветувања. Единствен и најголем проект им се тендерите и државните пари што ги делат на фирмите на СДСМ и на членовите на СДСМ, обвини портпаролот на ВМРО-ДПМНЕ, Димче Арсовски.

– Само денеска СДСМ го задолжува секое просечно 4-члено семејство за нови 4.000 денари. Граѓаните тонат во долгови, не можат да врзат крај со крај, а СДСМ, Заев, Анѓушев, Филипче, Шекеринска си делат народни пари по нивни блиски и фирми блиски до СДСМ. Јавниот долг во изминативе 3 месеци СДСМ го зголемија за 54 милиони евра, додека пак државниот долг го зголемија за 29 милиони евра – рече тој.

Арсовски рече дека јавниот долг во изминатите три месеци секој ден се зголемува за 580.000 евра, а реализацијата на капиталните проекти „досега е смешна, исто како што е смешен и растот на БДП“. Тој во името на партијата побара СДСМ да се откаже од намерите предвидени од фискалната стратегија со која што државниот и јавниот долг би отишле над 50% од БДП.

СДСМ реагираше на обвинувањата од Арсовски, порачувајќи оти не е точно дека долгот се зголемил за 32 милиони евра, бидејќи позајмените пари ќе се употребат за враќање долг направен од ВМРО-ДПМНЕ.

„Откако ВМРО-ДПМНЕ го создаде јавниот долг и ги задолжи граѓаните, за прв пат после цели 9 години, во 2017 година јавниот долг бележи намалување. Во 2018 година се задржува на тоа ниво. Криминалните политики на ВМРО-ДПМНЕ ги задолжија и осиромашија граѓаните. Наследени се обврски од 2 милијарди 114 милиони евра до 2020 година кои треба да се вратат. Тоа се камати и главнини од задолжувањата направени во времето на ВМРО ДПМНЕ“, стои во реакцијата од СДСМ.


Владата го отповика Мико, а Лазе Еленовски го прати во Брисел


Скопје, 28 февруари, 2018 - 10:12 (META) 

Владата на вчерашна седница отповикала на неколку конзули меѓу кои најекспониран е Џејсон Мико, долгогодишен колумнист во пропаднатиот весник „Дневник“ и консултант на владата во времето на ВМРО-ДПМНЕ, кој бил плаќан од буџетот.

Претходно тој бил и лобист за ВМРО-ДПМНЕ и консултант. Според документите заведени на Американската агенција за регистрација за странски соработници – ФАРА, ВМРО-ДПМНЕ за 7.500 долари месечно го ангажирала Џејсон Мико да дава консултантски услуги непосредно пред изборите на 5 јули 2006 година, на кои партијата дојде на власт.

Покрај Мико, отповикани се и Ричард Голдман, Томас Танеф, Ендру Димитри Пејкоф, Лоу Влашо и Пуршотам Карамангала Џајарам.

Во рамките на точките за кадровски измени, Владата вчера го именувала Бујар Дарлишта за в.д. директор на Управата за водење на матични книги, а Лазар Еленовски е назначен за  специјален пратеник на Владата на Република Македонија за НАТО интеграции во Брисел.

На предлог на Mинистерството за финансии Владата го усвоила Предлог – законот за пријавување и евиденција на обврски кои ги имаат буџетските институции. Имено, досега не постоел унифициран механизам на евиденција и следење на обврските на субјектите кои располагаат со јавни средства. Новиот предлог – закон предвидува преку електронски систем да се евидентираат преземени, а неисполнети обврски на институциите, како и неплатените обврски.

Законот ги опфаќа органите на државната власт, единиците на локалната самоуправа, установите и институциите кои вршат дејности од областа на културата, образованието, здравството, детската, социјалната заштита, како и во други дејности од јавен интерес.


Се спрема закон кој треба да спречи трупање на долгови на институциите и општините


Скопје, 9 февруари, 2018 - 12:19 (META) 

Законот за пријавување и евиденција на обврските преку кој ќе се регулираат долговите на институциите ќе влезе во владина процедура, најави денеска министерот за финансии, Драган Тевдовски.

Според него, на овој начин ќе се избегне натрупување на неевидентираните долгови како во минатото.

– На тој начин ќе се евидентираат преземени, доспеани и неплатени обврски во соодветен електронски систем од страна на сите органи на државната власт, јавните установи и институциите и единиците на локалната самоуправа. Така ќе имаме целосен увид во заостанатите обврски на сите овие субјекти, што е основен предуслов за систематско спречување на повторување на овој проблем во иднина – појасни Тевдовски на потпишувањето на договорот за меморандум за разбирање меѓу шест општини во рамки на проектот „Зајакнување на општинските совети – фаза на имплементација”.

За оваа цел, Министерството за финансии подготвува софтвер во кој сите институции редовно ќе ги пополнуваат податоците преку веб-апликација.

Тевдовски додаде дека и годинава во буџетот за 2018 година се предвидени повеќе средства за општините, што треба да овозможи редовно да ги вршат своите функции и паралелно да започнат да го намалуваат износот на неплатени долгови од минатото.


СДСМ: На семејства во Прилеп им биле отпишувани долгови во изборни години


Прилеп, 3 февруари, 2018 - 13:54 (META) 

Членот на Извршниот одбор на ОО СДСМ, Прилеп, Филип Попоски информираше дека, полицијата до Основното јавно обвинителство поднела кривична пријава против поранешниот директор на „Комуналец“ од Прилеп, Златко Ристески и други лица членови на Управниот одбор на претпријатието, за основано сомнение дека сториле кривично дело „злоупотреба на службена положба и овластување“.

„Според пријавата, Златко Ристески во 2012 година предизвикал сообраќајна несреќа со службеното возило „цитроен Ц4“, која не ја пријавил во полиција. Потоа, самиот организирал подигање и поправка на возилото, а „Комуналец“ добил фактура за набавка на автоделови за оштетеното возило во висина од 250.000 денари. Пријавените членови на Управниот одбор на „Комуналец“ ја одобриле исплатата на фактурата, иако Златко Ристески не дал на увид Налог за користење на службеното возило, или каков било документ, со што може да се потврди дека на денот кога се случила сообраќајката бил на службено патување“, изјави Попоски.

Тој додаде дека, „и актуелниот директор на „Комуналец“, Звонко Јованоски, соопштил дека Златко Ристески го оштетил ова јавно претрпијатие за половина милион евра.“

„Ристески, своеволно и спротивно на законот, им го отпишувал долгот за неплатени сметки за отпад на одредени семејства, со што само по овој основ, го оштетил претпријатието за над 10 милиони денари. Ненаплатените сметки биле во изборните години 2011, 2012 и 2016 година. Спротивно на закон, Ристески не им исплаќал одредени надоместоци на вработените, со што создал долг во висина од 47 милиони денари, од кои 21 милион денари за камати, судски трошоци, адвокати и извршители поврзани со тужби од вработени,“ изјави Попоски.


МЗШВ плати 137.000 евра заостанати долгови за членарини во меѓународни организации


Скопје, 25 декември, 2017 - 14:52 (META) 

Министерството за земјоделство, шумарство и водостопанство (МЗШВ) плати 137.000 евра по основ на заостанати долгови, за претходни години, за неплатени членарини во меѓународни организации за земјоделство, информираат од таму.

Станува збор за долгови за членарини во Организацијата за храна и земјоделство при ООН (ФАО), Меѓународната организација за вино (ОИВ) и Европската и медитеранска организација за заштита на растенија (ЕППО).

„Членството во ФАО е од исклучителна важност за Македонија, бидејќи токму преку оваа организација се спроведуваат клучни проекти за македонското земјоделство, како што се проектот за консолидација на земјоделското земјиште, за реонизација на земјиштето според почвените карактеристики, како и поддршка за полесен пристап до меѓународниот финансиски инструмент, Зелен климатски фонд“, се додава во соопштението на МЗШВ.

Податоците покажуваат дека претходната власт, за ФАО, до 2012 година не плаќала ништо. Потоа, следните години се плаќале минимални износи, а реалните долгови само се акумулирале. Цели пет години не се плаќала членарината во ЕППО, а три години не била платена членарината во ОИВ.

„Од централата на ФАО во мај годинава пратија допис до македонското Министерство за надворешни работи со предупредување дека Македонија поради неплатената членарина ќе го изгуби правото на глас“, соопштуваат од МЗШВ.


Заев вети владина помош на општините за враќање на долговите


Струга, 1 декември, 2017 - 21:22 (META) 

Премиерот Зоран Заев најави план за помош на општините во справувањето со долговите кои надминуваат 200 милиони евра, упатувајќи порака до градоначалниците да се воздржат од политизација на администрацијата и да применат креативност во надминувањето на предизвиците.

– Може ќе заминете од функцијата посиромашни, но ќе бидете посреќни – рече Заев на Националниот форум за градоначалници, кој се одржува денеска и вчера во Струга. На форумот организиран од Програмата за развој на Обединетите нации (УНДП) во партнерство со Министерството за локална самоуправа и со Министерството за финансии, 79 градоначалници имаа можност да дискутираат со премиерот и со министрите за приоритетите и за потребите на општините.

– Локалните заедници се срцето на развојот и демократијата. Општината е местото каде се создава квалитетот за животот на граѓаните – рече постојаниот претставник на УНДП, Луиза Винтон.

Самуел Жбогар,  шефот на Делегацијата на ЕУ во Скопје, истакна дека патот кон решавање на локалните проблеми е тежок, но води кон подобар живот за граѓаните.

Премиерот Заев најави дека Владата ќе работи заедно со градоначалниците за вистинска децентрализација преку пренесување на надлежностите и обезбедување поголемо финансирање за локалниот развој.

– Не постои причина зошто капиталните инвестиции, на пример, во образованието, да не бидат во рацете на општините или планските региони. Вие подобро знаете каде се потребни парите – рече Заев.