Лазе Велковски му ја предаде должноста директор на БЈБ на Сашо Тасевски


Скопје, 23 август, 2018 - 14:20 (META) 

Досегашниот директор на бирото за јавна безбедност, Лазе Велковски денеска му ја предаде должноста на новоизбраниот директор Сашо Тасевски, соопшти МВР.

Тасевски е магистер по безбедност и докторант на Факултетот за безбедност. Од 2001 година работел кај претседателот на државата Бранко Црвенковски, во одделот за странски делегации, потоа кај министерот за внатрешни работи Оливер Спасовски.

На почетокот на кариерата Тасевски бил припадник на единицата за специјални задачи „Тигар“. Посетувал курс за обезбедување ВИП личности во САД, во 2004 година.

Тасевски во јавноста стана познат како полицискиот службеник од обезбедувањето на министерот за внатрешни работи Оливер Спаосовски, кој извади огнено оружје и пукаше во одбрана при упадот во Собранието на 27 април минатата година.

Велковски кој беше разрешен бидејќи ја испрати неговата ќерка со службен џип на одмор во Грција.


Сашо Тасевски назначен за нов директор на Бирото за јавна безбедност


Скопје, 22 август, 2018 - 12:58 (META) 

На денешната владина седница едногласно бил усвоен предлогот Сашо Тасевски да биде назначен за нов директор на Бирото за јавна безбедност. Оваа информација ја сподели на својот официјален „Фејсбук“ профил заменик министерот за надворешни работи Андреј Жерновски кој присуствува на владината седница бидејќи шефот на дипломатијата, Никола Димитров, е во официјална посета на САД.

Тасевски е магистер по безбедност и докторант на Факултетот за безбедност. Од 2001 година работел кај претседателот на државата Бранко Црвенковски, во одделот за странски делегации, потоа кај министерот за внатрешни работи Оливер Спасовски.

На почетокот на кариерата Тасевски бил припадник на единицата за специјални задачи „Тигар“. Посетувал курс за обезбедување ВИП личности во САД, во 2004 година.

Тасевски во јавноста стана познат како полицискиот службеник од обезбедувањето на министерот за внатрешни работи Оливер Спаосовски, кој извади огнено оружје и пукаше во одбрана при упадот во Собранието на 27 април минатата година.

Тој доаѓа на местото на разрешениот Лазо Велковски кој беше разрешен бидејќи ја испратил неговата ќерка со службен џип на одмор во Грција.


Владата го разреши директорот на БЈБ, Лазо Велковски


Скопје, 15 август, 2018 - 9:33 (META) 

Владата го разреши директорот на Бирото за јавна безбедност, Лазо Велковски. До именување нов директор со БЈБ ќе раководи досегашниот заменик директор, Бесир Деари.

Министерот за внатрешни работи, Оливер Спасовски, поднесе предлог за разрешување на Велковски откако на Илинден, без решение, со службен џип и обезбедување, ја испратил ќерка си во Грција. Тој сам направил проценка оти безбедноста на ќерка му е загрозена и треба да патува со полициско возило, но за одлуката немал решение.

Велковски работи 27 години во МВР и кариерата ја поминал и во Агенцијата за разузнавање, а по разрешувањето премиерот Зоран Заев рече дека најверојатно ќе остане вработен во МВР.

Велковски го водеше Бирото за јавна безбедност 1 година, и дојде како наследник на Митко Чавков.


Владата денеска ќе одлучува за разрешувањето на Велковски


Скопје, 14 август, 2018 - 9:37 (META) 

На денешната седница Владата треба да решава за предлогот на министерот за внатрешни работи, Оливер Спасовски, за разрешување на Лазо Велковски, директорот на Бирото за јавна безбедност (БЈБ).

Спасовски го поднесе предлогот за разрешување пред една седмица, откако Одделот за внатрешна контрола и професионални стандарди утврдил дека џипот „ренџ ровер дискавери спорт“ со регистарски таблички СК-9559-АЛ бил пратен во Грција со налог потпишан од директорот на јавна безбедност, а со возилото управувал вработен во Одделот за заштита на определени личности и објекти. Џипот, според пишувањата, ги превезувал ќерката на Велковски и нејзини другарки.

Премиерот Заев вчера по одбележувањето на годишнината на Рамковниот договор, потенцираше дека директорот на Бирото за јавна безбедност, Лазо Велковски иако е професионалец, направил грешка и поради тоа треба да поднесен одговорност и потенцираше дека предлогот за неговото разрешување на е внатре партиска пресметка.

– Секако јас верувам дека тој ќе остане и понатаму значаен фактор во МВР заради тоа што е важен со неговото искуство и е од помош на државата – нагласи премиерот.


Заев: Суетата ја ставам на страна, пријателството со Бугарија треба да се негува и доградува


Скопје, 13 август, 2018 - 15:01 (META) 

Правам сè за да изградам пријателство. Гледате дека моите суети ги ставам на страна, сакам искрено да градам пријателство. Бугарија е партнер на Македонија и тоа го покажа неколку пати и не е во ред тоа да го заборавиме, рече премиерот Зоран Заев на новинарско прашање дали изјавата на бугарскиот премиер Бојко Борисов ја гледа како закана за евроатланските аспирации на Македонија.

– Апелирам сите заедно да ги тргнеме политичките интереси, голиот популизам и она што навистина не предизвикува да бидеме недоволно внимателни. Договорот со Бугарија го потврдивме преку нашите потписи но треба тоа да го негуваме и доградуваме и постојано да тежнееме кон градење пријателство кое од обостран интерес на двете земји и двата народи и на генерациите кои што доаѓаат. Треба сите да внимаваме и да придонесуваме во тоа заедничко пријателство – рече Заев кој на прашањето дали двете земји конечно ќе се договорат за Илинденското востание тој одговори дека веќе одбележуваме дел од нашата заедничка историја.

Премиерот Заев потенцираше дека директорот на Бирото за јавна безбедност, Лазе Велковски иако е професионалец, направил грешка и поради тоа треба да поднесен одговорност и потенцираше дека предлогот за неговото разрешување на е внатре партиска пресметка.

– Станува збор за понесување одговорност кое граѓаните го очекуваат од политичарите и носителите за јавните функции. Господинот Велковски е еден од моите први соработници и соработници на министерот Оливер Спасовски, но грешката е направена и одговорноста мора да се понесе. Секако јас верувам дека тој ќе остане и понатаму значаен фактор во МВР заради тоа што е важен со неговото искуство и е од помош на државата. Спасовски даде предлог за разрешување, владата на утрешната седница ќе го разгледа предлогот а потоа ако владата одлучи да постапи по овој предлог ќе разгледуваме и можни решенија. Господинот Велковски е припадник на СДСМ и секогаш важел за сплотувачки фактор во СДСМ. СДСМ е единствен и сплотен посебно пред вакви важни моменти – изјави Заев и додаде дека до сега не размислувале за нови имиња кои би можеле да го заменат Велковски и напомена дека ќе треба време да се најде вистинско решение преку добра анализа.

Во врска со кампањата за референдумот Заев вели дека таа дополнително ќе се засили во јавноста и ги повика граѓаните да го погледнат договорот и да видат дека идентитетот е потврден а дека македонскиот јазик е загарантиран.

– Владата утре на седница ќе дебатира и ќе донесе одлука како да помогне во информативниот дел на кампањата за можат овие 3 проценти кои што го прочитале Договорот да станат 100 проценти – информираше Заев.


ВМРО-ДПМНЕ: Жртвувањето на директорот на БЈБ нема да ги реши проблемите во МВР


Скопје, 8 август, 2018 - 14:41 (META) 

Замислете, директорот на Бирото за јавна безбедност злоупотребува службен џип за да го пренесе друштвото на својата ќерка на одмор во авто – камп во Грција и притоа да застанува по продавници. Жртвувањето на директорот на БЈБ нема да ги реши проблемите во МВР.

Ова денеска на прес-конференција го изјави портпаролот на ВМРО-ДПМНЕ, Наум Стоилковски.

Тој додаде дека „проблемите нема да ги реши ниту обидот за дефокусирање со измислени „големи акции“ против наводни екстремисти или против поранешни градоначалници, само за да се оттргне вниманието од аферите поврзани со Оливер Спасовски.“

„Кај министерот Спасовски лежи најголемата одговорност. Неговата партизација на полицијата и ставањето на МВР во партиска функција ја претвори Македонија во државата во која граѓаните не се чувствуваат безбедни. А, за тоа не може да ја понесе одговорноста само туроператорот Лазе Велковски. Оливер Спасовски мора да одговори зошто пет дена го криеше скандалот? Спасовски мора да каже кога и кому директорот на БЈБ ги пријавил заканите? Ако воопшто постоеле закани, какви биле тие закани и за што? Што има МВР преземено по тие закани и колкумина се приведени?“, рече Стоилковски.

Тој додаде дека „доколку МВР на Спасовски не апси и не може да открие кој му се заканувал на директор на Бирото за јавна безбедност за да биде гарантирана неговата безбедност, може ли Спасовски воопшто да гарантира безбедност на граѓаните и на државата?

„Дали пак можеби инсистирањето на оставка е дел од внатрешните пресметки во МВР откако директорот, познат како туроператор Велковски, неодамна го приведе Драган Симоновски, советникот и близок соработник на Спасовски? Оливер Спасовски, престани да се криеш зад туѓа одговорност и поднеси оставка од местото кое е клучно за внатрешната безбедност на државата“, додаде Стоилковски.


Затворени 19 објекти и приведени 26 лица при рација на МВР во Тетово, Битола и во Велес


Скопје, 19 ноември, 2017 - 14:46 (META) 

При спроведени контроли на подрачјата на СВР Тетово, СВР Битола и СВР Велес, приведени биле 26 лица, а привремена забрана за работење добиле 19 угостителски објекти, соопшти денеска на прес-конференција директорот на Бирото за јавна безбедност, Лазе Велковски.

Во некои од локалите бил откриен незаконски престој на лица во Република Македонија, користење наркотици, како и управување возила под дејство на алкохол.

– Во Тетово и во Гостивар, од 31 објект, на 19 објекти од Управата за јавни приходи и од Државниот пазарен инспекторат им се изречени мерки забрана за вршење дејност во траење од 15, односно 30 дена, бидејќи не издавале фискална сметка, не поседувале фискален апарат и имале нерегистрирани вработени. Поради поседување дрога и непоседување документи за идентификација, приведени се вкупно 26 лица, од кои 16 македонски државјани и десет странски државјанки, девет државјанки на Република Србија и една на Република Црна Гора. Кај дел од гостите во објектите се пронајдени пакувања со прашкаста материја – вели Велковски.

Контролата во Битола не покажала посериозни прекршоци и не е констатирано нарушување на јавниот ред и мир. Во Велес, Кавадарци и во Неготино алкотестирани биле 232 возачи, а кај 29 возачи е утврдено присуство на алкохол.

Велковски нагласи дека МВР во соработка со другите институции ќе продолжи со вакви контроли и во следниот период.


ВМРО-ДПМНЕ: СДСМ некрофилски ги поврзува Смиљковско Езеро со работењето на МВР


Скопје, 13 јули, 2017 - 16:57 (META) 

Опозициската ВМРО-ДПМНЕ ги обвини министерот за внатрешни работи, Оливер Спасовски, и СДСМ дека со денешниот брифинг во МВР, на кој беа презентирани фактури, сметки и податоци за трошењето на директорите на УБК и на БЈБ и на министрите во текот на владеењето на ВМРО-ДПМНЕ, „се занимава со ланскиот снег“.

„СДС некрофилски се обидува да ги поврзе трагичната сообраќајна незгода во која животот го загуби Никола Младенов, грозоморното убиство кај Смиљковско Езеро и настаните во Диво Насеље со оперативното работење на службите и нивните контакти со странски гости, делегации и соработници. Манипулација од најнизок тип е обидот на СДС да ја излаже јавноста дека функцинерите во МВР се расфрлале. Пред две години, односно до доаѓањето на СДС на власт, МВР имаше соработка со бројни служби која даде исклучителни резултати признаени и на меѓународен план“, се вели во реакцијата.

Партијата му порача на Спасовски да не ја дефокусира јавноста, туку да се зафати со вистинските проблеми, притоа посочувајќи дека жителите на Љуботен очекуваат одговор кој ги вандализираше православните гробишта.


Горан Николовски – шеф на УБК, Лазо Велковски – на БЈБ, Владата донесе предлог за смена на Зврлевски


Скопје, 16 јуни, 2017 - 20:11 (META) 

На седницата што се одржува попладнево, Владата донесе одлука до Собранието да поднесе предлог за разрешување на јавниот обвинител на Република Македонија, Марко Зврлевски, и ги избра новите  директори на Бирото за јавна безбедност и на Управата за безбедност и контраразузнавање, односно деловите на МВР кои се задолжени за полициските сили и за тајната полиција и за контраразузнавањето.

Горан Николовски е избран за директор на Управата за безбедност и контраразузнавање, каде досега директоруваше Владимир Атанасовски. Нов директор на Бирото за јавна безбедност е Лазо Велковски, кој го наследува Митко Чавков.

Горан Николовски е вработен во Управата за безбедност и контраразузнавање, каде е раководител на одделот за контраразузнавање за Балкан, а Лазо Велковски, долгогодишен вработен во МВР, во текот на владеењето на ВМРО-ДПМНЕ, до формирањето на техничката влада, бил преместен во Агенцијата за разузнавање.

На владината седница е констатирано дека новоименуваните директори, Велковски и Николовски, се квалитетни експертски решенија со долгогодишно работно искуство во областа, кои не биле и не се членови на политички партии. Изразено е уверување дека Велковски и Николовски успешно ќе одговорат на одговорностите во двата важни органа за безбедноста, што функционираат при МВР, на чии челни позиции се поставени, со оглед дека претстојат сериозни реформи во МВР и во тајните служби, согласно забелешките на Извештајот на експертската група на ЕК, предводена од Рајнхард Прибе. За разрешените директори Чавков и Атанасовски е констатирано дека учествувале во недозволиви и незаконски активности против државата, соопшти Владата.

Одлуката за разрешување на републичкиот обвинител Зврлевски е донесена поради незаконито, ненавремено и недоволно стручно вршење на функцијата.  Констатирано е дека обвинителот Зврлевски не е способен за извршување на функцијата, не поднесувал барања за покренување кривична постапка за случаи предвидени со закон и со тоа го нарушил нарушил угледот на функцијата, се вели во соопштението од Владата.

 


Во 17 часот нова седница на влада, на дневен ред предлогот за разрешување на Зврлевски


Скопје, 16 јуни, 2017 - 14:23 (META) 

Владата денеска во 17 часот ќе ја почне својата петта седница. Од кабинетот на премиерот информираат дека на дневен ред на седницата ќе се најде предлогот до Собранието на Република Македонија за разрешување на Марко Зврлевски од функцијата јавен обвинител на Република Македонија (врз основа на член 67 од Законот за јавното обвинителство), одредени кадровски прашања, како и други актуелни прашања што се од интерес на граѓаните.

Министерот за внатрешни работи, Оливер Спасовски, денеска на прес-конференција рече дека одлучил кои ќе бидат новите директори на Управата за безбедност и контраразузнавање (УБК) и на Бирото за јавна безбедност (БЈБ), но дека нема да ги каже нивните имиња до седницата на владата на која треба да ги предложи.

– Имам донесено одлука и ќе ја доставам на седница на влада кога ќе мислам дека треба да бидат избрани – рече Спасовски.

Пред именувањето на новите директори, владата треба да го разреши актуелниот директор на УБК, Владимир Атанасовски, и на БЈБ, Митко Чавков.