Организацијата на работодавци на Македонија (ОРМ), заедно со Македонската хотелска асоцијација (ХОТАМ), бара измени и дополнувања на законската регулатива што се однесува на ангажманот на сезонските работници во туризмот.
Двете асоцијации предлагаат нов модел за пријавување и за плаќање на сезонските работници, по т.н. систем на дневни купони, со што значително ќе се поедностави пријавувањето на овие работници, ќе се зголеми нивната социјална сигурност и ќе се елиминира плаќањето високи глоби за непријавените работници.
– Предлозите кои се однесуваат на ангажманот на сезонските работници ќе ги доставиме на усвојување пред социјалните партнери, штом се создадат услови за тоа, најверојатно веднаш по завршувањето на парламентарните избори – вели претседателот на ОРМ, Ангел Димитров.
Претседателот на ХОТАМ, Крсте Блажевски, вели дека сегашното решение за прераспределба на работното време во Законот за работни односи е недоволно прецизно и предизвикува проблеми во примената.
– Разгледавме и искуства од оваа област во други земји, како што е Словенија, кои сметаме дека се применливи и кај нас. Исто така, ја разгледуваме и идејата законски да се дорегулира сезонското ангажирање во туризмот, на студенти и на лица до 25 години, како мерка со која ќе се намали одливот на млад кадар во странство – додава Блажевски.
ОРМ ја покрена оваа иницијатива во рамките на проектот „Унапредување на социјалниот дијалог“ финансиран од Европската Унија, а го спроведува Меѓународната организација на трудот.
