По повеќе од еден час расправа, пратениците од Комисијата за политички систем и односи меѓу заедниците, конечно почнаа да поставуваат прашања до специјалната јавна обвинителка, Катица Јанева.
Таа најави дека на сите прашања ќе одговори во текот или по завршувањето на расправата.
Еве кои прашања ѝ беа поставени:
Рафиз Алити од ДУИ:
- Дали Јанева ќе ги преземе случаите „Монструм“, „Сопот“, „Диво Насеље“ и случајот за протестите во Ѓорче Петров?;
- Зошто Јанева бара продолжување на рокот од 18 месеци за работата на СЈО?;
- Каде точно е приведен градоначалникот на Пустец, Едмонд Темелко, во Македонија или во Албанија?
Роза Топузовска-Каровска:
- Кој, зошто и за која цел прислушувал и кој и зошто ги трошел парите на граѓаните?;
- Зошто Јанева сега го признава легитимитетот на Собранието и што се променило во последните шест месеци?;
- Зошто СЈО потрошило малку пари и на што планираат да ги потрошат преостанатите?;
- Колкави се платите и хонорарите на врабоените во СЈО и на лицата ангажирани од ова обвинителство?
Зоран Илиоски од ВМРО-ДПМНЕ:
- Дали Јанева повела постапка да ги прибави и другите 500.000 разговори за кои претпоставува дека се наоѓаат кај лидерот на СДСМ, Зоран Заев?;
- Дали Јанева има информации колку пари е јавниот превоз во Токио?;
- Дали сумата од 360.000 евра што тимот на Јанева по грешка ја испратил до новинарите за случајот „Транспортер“ е точна и ако е така, како дошле до таа сума?;
- Дали обвинителите за кои Јанева изјави дека нема потреба од нив биле истерани од СЈО затоа што не сакале да поднесат обвинение за случајот „Транспотер“?
