Европската Унија мора да биде непопустлива кон барањата на Велика Британија кога станува збор за условите за нејзиното излегување од ЕУ, рече денеска претседателот на Европската комисија, Жан-Клод Јункер.
– Не може со една нога да бидете надвор, а со друга внатре. По тоа прашање мора да бидеме непопустливи – рече Јункер на конференција во Париз, предупредувајќи ја Британија дека ризикува да „погази сè што има изградено“ за шест децении европска интеграција.
Реакцијата на Јункер доаѓа по вчерашната изјава на британската премиерка Тереза Меј, која рече дека сака договор кој на Британија ѝ нуди „максимална слобода“ да дејствува на европскиот единствен пазар, но, од друга страна, и да ја задржи контролата врз имиграцијата.
Таа најави дека ќе ги почне преговорите со Брисел за Брексит кон крајот на март.
Францускиот претседател Франсоа Оланд вчера ја предупреди Британија дека ќе мора „да ја плати цената“ за својата одлука за напуштање на ЕУ.
