Италијанските воздухопловни сили спроведуваат акција за спасување на неколку стотоци имигранти од трговскиот брод без екипаж кој трговците со луѓе го оставиле во Медитеранот. Еден од имигрантите од бродот „Езадин“, кој плови под знамето на Сиера Леоне, испратил порака во која вели дека бродот се движи кон италијанското крајбрежје, нема екипаж и нема кој да го управува.
Воздушната база во Јужна Италија испратила хеликоптер, а во акцијата се вклучени и крајбрежната стража и медицинската екипа. Бродот, во моментот е оддалечен 60 километри југоисточно од брегот и на него се наоѓаат околу 450 имигранти.
Пред два дена италијанските морнари го пресретнаа бродот „Блу скај ем“ кој пловел под молдавско знаме и на кој се наоѓале најмалку 700 имигранти, поголемиот број од Сирија. Бродот претходно бил напуштен од трговците со луѓе кои го управувале од Турција кон водите на Грција. Избегната е голема несреќа откако шест припадници на морнарицата успеале со хеликоптер да се спуштат на бродот и да го стават бродот под контрола. Помеѓу имигрантите имало 60 деца и две трудни жени, а поголемиот дел од нив имале хипотермија и скршеници.
