Седум лица осомничени за поврзаност со движењето на исламскиот свештеник Фетулах Ѓулен се фатени при обид со камион илегално да пребегнат од Бугарија во Романија, јавува дописникот на „Мета“ од Софија. Меѓу приведените има тројца шефови на полиција, универзитетски професор, наставник и поранешен новинар.
Возачот на камионот е уапсен поради шверц на луѓе, а другите лица експресно се депортирани во Турција, откако биле сослушани.
Турските власти поднесоа повеќе обвиненија против седумте лица, веднаш по нивното пристигнување во Турција. Возачот, кој исто така е турски државјанин, ќе биде депортиран во Турција, откако ќе ја отслужи затворската казна во Бугарија.
Бугарските власти соопштија дека осомничените влегле во Бугарија на 12 октомври, преку граничниот премин Капикуле.
Бугарското МВР соопшти дека седумте лица се испорачани на властите во Анкара, во согласност со договорот меѓу Бугарија и Турција од 1968 година.
Официјална Анкара го обвини Ѓулен, кој живее во егзил во САД, за организирање на државниот удар.
