Здружението на новинарите на Македонија денеска ја поздрави одлуката на Европскиот суд за човекови права за случајот „Селмани и други против Република Македонија“, поврзана со настаните од 24 декември 2012 година или т.н. „црн понеделник“, кога новинарите беа насилно избркани од галеријата на Собранието на Република Македонија.
„Пресудата на Европскиот суд констатира повреда на две права гарантирани со Европската конвенција за човековите права и тоа: правото на слобода на изразување од член 10 и правото на фер судење од член 6 од Конвенцијата. Оваа пресуда е прва со која се утврдува повредата на слободата на изразување и е многу важна за демократијата и за владеењето на правото во Република Македонија. Истовремено, пресудата е и победа на новинарската заедница, која покажа дека за правда секогаш вреди да се бориме. Правдата можеби е бавна, но секогаш победува“, стои во соопштението на ЗНМ.
Од здружението нагласуваат дека пресудата придонесува и во Македонија да се создаде правна култура и да се афрмира принципот на почитување на основните човекови права и слободи.
„Оваа пресуда претставува доказ дека институциите во Република Македонија потфрлија во исполнување на својата основна задача, да ги штитат и да ги промовираат човековите права“, додаваат од ЗНМ.
Оттаму информираат дека сите детали околу пресудата ќе бидат презентирани на прес-конференција, која ќе се одржи утре, во 11 часот, во Клубот на новинари.
