Претседателот на СДСМ, Зоран Заев, денеска се сретна со амбасадорот на Кралството Холандија, Јоп Хеферс, со кој разговарал за можниот излез од политичката криза, за причините за сложената ситуација во земјата и за последиците на економски план и врз европерспективите.
На средбата Заев му објаснил на Хеферс за злоупотребите на власта обелоденети преку проектот „Вистината за Македонија“ и дека СДСМ ги разгледува сите механизми за враќање на слободата и на демократските процеси во Македонија.
– Тоа, како што стана јасно од прислушувањата што ги правела власта, се манифестира низ закани, уцени, притисоци, криминал и низ корупција, во функција на лични и на теснопартиски цели, а на штета на интерсите на државата и на граѓаните – рече претседателот Заев.
Холандскиот амбасадор Хеферс рекол дека неговата земја и Европската унија внимателно ги следат загрижувачките состојби во Македонија и ја повторил подготвеноста за помош во наоѓање можно решение, информираат од СДСМ.
