Вработените во Мeдиумската информативна агенција (МИА) утре излегуваат на предупредувачки получасовен протест, со барање за зголемување на платите, информира Самостојниот синдикат на новинари и медиумски работници (ССНМ). Протестот ќе се одржи пред просториите на АД МИА со почеток во 11 часот.
„Протестот се организира со поддршка на ССНМ и на Синдикатот на медиумски информативни агенции (СМИА). Новинарите и медиумските работници од МИА веќе подолго време бараат покачување на нивните плати, согласно Колективниот договор и усогласување со трошоците за живот, но Владата досега не најде за сходно да одобри зголемување на платите во овој државен медиум“, наведено е во соопштението од ССНМ.
Предупредувачките протести ќе продолжат и во наредните денови, а во случај тие да не резултираат со разбирање и прифаќање на барањата на вработените, ќе бидат преземени и порадикални чекори.
Синдикатот ги повикува сите вработени во АД МИА да се приклучат кон протестот.
Самостојниот синдикат на новинари и медиумски работници дава безрезервна поддршка на своите членови и на сите вработени новинари и медиумски работници во МИА и потсетува дека основен предуслов за слободно и професионално новинарство е стабилна социо-економска состојба на новинарите и медиумските работници.