Ограничувањето на брзината на возење низ сообраќајниците во урбаните средини во земјава од досегашните 60 на 50 километри на час, кое деновиве се најде во фокусот на јавноста, е предвидено со новиот Закон за безбедност во сообраќајот на патиштата, кој во моментов е во собраниска процедура и, според очекувањата, во догледно време треба да стапи на сила.

Во членот 35 од предлог-законот, кој од познати и непознати причини релативно долго време е во процедура, стои дека „на јавен пат во населено место, возачот не смее со возилото да се движи со брзина поголема од 50 километри на час, односно со брзина поголема од брзината дозволена со поставениот сообраќаен знак за целото населено место или за определен негов дел“.

Законот предвидува исклучок, односно да смее да се вози со брзина поголема од 50, но не повеќе од 70 километри на час, доколку за тоа постојат сообраќајно-технички услови.

Според извештаите од седниците на надлежните собраниски комисии, во врска со овие ставови од членот на Законот не се поднесувани амандамани, освен за ставовите што се однесуваат на казните во случај на непочитување на ограничувањата на брзината.

Од Министерството за внатрешни работи (МВР) уште на средината на ноември минатата година, кога беше подготвен предлог-законот и требаше да се најде во собраниска процедура, за „Мета“ изјавија дека брзината на двиежење на возилата во урбани средини се намалува од 60 на 50 километри на час. Оваа измена, тогаш ја означија како една од поголемите во новиот Закон за безбедност во сообраќајот на патиштата.

– Ограничувањето на брзините, како и казнената политика во новиот закон за безбедност во патниот сообраќај остануваат исти, единствена промена има во максималната брзина на движење во убрани средини, каде максималната дозволена брзина е намалена од 60 на 50 километри на час, во согласност со европската практика – изјавија тогаш од МВР за „Мета“.

Минатата недела, координаторот на советничката група на СДСМ во Советот на Град Скопје, Дамјан Манчевски, соопшти дека на седница на Советот биле усвоени предлозите за воведување зони за смирен сообраќај и места во градот каде брзината на автомобилите ќе се ограничи на 30 километри на час или помалку.

Манчевски на прес-конференцијата изјави дека бараат од МВР веднаш да ја спроведе мерката за ограничување на брзината на движење низ Скопје на 50 километри на час.