Околу 15.000 домаќинства добија наредба да се евакуираат во канадска Британска Колумбија, додека пожарникарите се борат со бесните шумски пожари кои ги зафатија и домовите.
Канадските власти информираа дека се запалиле „значителен“ број згради во Западна Келоуна – град со околу 36.000 жители, при што повеќе од 2.400 домови се евакуирани, пренесе Би-би-си.
Во целата покраина е прогласена вонредна состојба, при што горат стотици одделни пожари. Воздушниот простор околу меѓународниот аеродром во Келоуна сега е затворен за секаков вид на летала, освен за воздушните противпожарни возила.
Официјалните лица во провинцијата ги замолија жителите да ги почитуваат предупредувањата и ги повикаа „неодговорните“ туристи да престанат да летаат дронови во областа, пренесува Гардијан.
Туристи објавуваат свои искуства од шумските пожари на социјалните мрежи, при што може да се забележат слики од луѓе кои стојат во редици за да ги видат шумските пожари.
🔴 CANADA 🇨🇦| #KelownaWildfires : striking footages of major #fires in the #Kelowna region of #Canada (population 132,000). Strong winds are pushing the flames towards the center and south, with the fire now reaching the top of the mountain south of #Glenrosa. #canadawildfires pic.twitter.com/kqTBhhdR2q
— Nanana365 (@nananamedia365) August 19, 2023
Дроновите би можеле принудно да приземјат авиони вклучени во клучните мисии за гаснење пожари, предупреди министерот за вонредни состојби во Британска Колумбија, Бовин Ма.
Стотици километри северно, огромен пожар се издигнува и кон градот Јелоунајф. Официјалниот рок за евакуација на градот истече во петокот. Локален функционер, како што јавува Би-би-си, подоцна истиот ден изјавил оти речиси сите жители заминале со автомобили или со авион. Градот има популација од околу 19.000 жители.
Во Британска Колумбија под евакуација се околу 15.000 домови, при што 20.000 други се под тревога.
Timelapse shows how fast the McDougall Creek fire moved in 3 hours Thursday, before it jumped the lake#BCWildfire #Kelowna #WestKelowna #kelownafires #WestKelownafire pic.twitter.com/9mN5y1RwAa
— Crime With Bobby (@crimewithbobby) August 20, 2023
Канада ја има својата најлоша сезона на шумски пожари во историјата, со најмалку илјада пожари кои горат низ целата земја, според Канадскиот меѓуагенциски центар за шумски пожари. Досега изгорела површина од над 14 милиони хектари, што е приближно на големината на Грција и речиси двојно поголема површина од онаа на последниот рекорд од 7,3 милиони хектари. Во пожарите досега загинаа четири лица.
Експертите велат дека климатските промени го зголемуваат ризикот од топло и суво време кое веројатно и понатаму ќе поттикнува шумски пожари.
