Во рамките на осмиот Интернационален фестивал на стрипови и фантазија во Сомбор, Србија, Домот на културата – Ѓаково заедно со Клубот на љубители на стрипот – Сомбор во среда, со почеток во 19 часот, ќе се отвори изложбата „Современи македонски стрип автори“.
Приредувач и селектор на оваа изложба е програмскиот координатор на Стрип центар на Македонија – Велес, Томе Трајков.
На изложбата ќе бидат изложени над 40 стрип табли со стрипови од различни жанрови, изработени од стрип автори од Северна Македонија, а посетителите ќе имаат можност да се запознаат со актуелната македонска стрип сцена.
Овој фестивал е поддржан преку проектот „Култура за демократија“ на швајцарската влада и имплементиран од Фондацијата Heartefact, како и од страна на градот Сомбор.
Како што појасни Томе Трајков, станува збор за истата поставка која што беше изложена за време на 8. Интернационален фестивал на стрипови и фантазија во Сомбор, на којшто и самиот присуствуваше. Застапени се голем број стрип артисти од земјава: Ангела Петрушевска, Дамјан Шокев, Дарко Богданов, Ѓургица Варела, Илко Стојановски, Јана Бутеска, Лазар Ангелков, Максим Ристески, Методија Стојановски, Оливер Цветковски, Славица Купенкова, Тоде Блажевски и Цанко Стефанов.
Сценаристи на повеќето од делата се Александар Стеванов од Штип, Ване Трајков и Ѓоре Гелев од Велес, како и Александра Ристески и Војдан Андонов од Скопје.
Во низата на овие изложби „Клубот на љубители на стрипот – Сомбор“ Србија, ќе бидат организирани уште две изложби. Меѓународната соработка на Стрип центарот на Македонија ќе биде проширена преку нови проекти.