Системот за бруто-плата функционира непречено, велат од Управата за јавни приходи (УЈП) откако „Мета“ објави дека сметководителите се пожалија дека освен системот за поднесување годишна даночна пријава, и системот преку кој се врши прием на декларации за плати не функционира неколку дена.
– Што се однесува до системот за бруто-плата, тој непречено функционира, односно декларацијата и налогот за плаќање врз основа на поднесена месечната пресметка за интегрирана наплата (МПИН) се доставуваат најдоцна во рок од 24 часа од поднесувањето – велат од УЈП.
Управата за јавни приходи денеска ги продолжи роковите за поднесување даночни пријави и извештаи поради отежнато и масовно користење на системот „е-даноци“, поради што тој не функционира.
