„Последните настани на синдикалната сцена во Македонија дополнително го разнебитуваат синдикалното организирање. Тоа е на директна штета на работниците и на борбата за нивните работнички права. Ударот врз синдикалното движење, со исклучувањето на Мултиетничкиот синдикат за образование, доаѓа по налог на првиот човек на ССМ“, вели Мила Царовска, претседателка на комисија за труд и социјална политика на СДСМ.
– Живко Митревски е добро познат на јавноста како човек кој власта во заминување го држи со неколку функционерски месечни приходи. Само за да ги аминува штетните закони со кои им се намалуваат правата на работниците и се влошува нивната положба. Овој синдикален лидер, срамно, со власта ја договори минималната плата која од 2016 година треба да достигне едвај 10.080 денари, со што ги остави работниците во сиромаштија. Овој синдикален лидер го аминуваше Законот за безбедност при работа со што работниците незаштитени работат на секакви временски услови – вели Царовска.
Според Царовска, Законот за работни односи со секоја негова измена и дополнување ги ограничува правата на работниците, а ги засилува правата на работодавците. Таа додаде дека синдикатот мора да се ослободи од политичко влијание на власта и да се обезбеди целосна независност на синдикалните движења.
