Холандскиот јавен обвинител денеска ги објави имињата на четворица осомничени за соборување на патничкиот авион на „Малезија Ерлајнс“ во јули 2014 година над Украина, кога загинаа сите 298 патници и членови на екипажот.
Главен осомничен е поранешниот полковник на руската разузнавачка служба ФСБ, Игор Гиркин, познат и како Стрелков, лидер на проруските сепаратисти во Донецката област во Украина.
Осомничени се и двајца поранешни припадници на руската специјална служба ГРУ, односно Военото разузнавање, Сергеј Дубинскиј и Олег Пуљатов, и Украинецот Леонид Каченко, кој предводел сепаратистичка воена единица во источна Украина.
– Здружениот истражен тим нема да бара екстрадиција на осомничените, затоа што уставите и на Русија и на Украина забрануваат екстрадиција на нивни државјани – изјави холандскиот обвинител Фред Вестербеке. Наместо екстрадиција, истражниот тим ќе побара Москва да ги уапси Гиркин, Дубински и Пуљатов.
Судењето во Холандија е закажано за 9 март 2020.
Веднаш по прес-конференцијата на холандскиот обвинител, генералниот секретар на НАТО, Јенс Столтенберг го поздрави напредокот во истрагата.
– Ова е важна одредница во напорите да се открие целата вистина и да се обезбеди правдата за убиството на 298 луѓе од 17 земји. Имам целосна доверба во независноста и професионализмот на истрагата и во холандскиот правен систем. Како што нагласи Советот за безбедност на ОН, сите држави треба да соработуваат во напорите за утврдување на вистината, правдата и одговорноста – порача Столтенберг.
