Првиот студентски референдум, кој требаше да се одржи утре, ќе се одложи за една недела, информираат од „Студентски пленум“. Новиот датум за референдумот е 5 октомври.
– Голем број студенти апелираа дека индексите им се заглавени во административните служби, односно на студентски прашања заради уписите. Втората причина е што уписите на одредени факултети се пролонгирани, односно ќе траат до 30 септември. Трета причина е затоа што дел од студентите се во САД на програмата „Ворк енд травел“ и фер би било да ги почекаме да се вратат за да можат да си го искажат мислењето – вели Деа Здравковска од „Студентски пленум“.
Од пленумот потсетија дека студентскиот референдум е единствената алатка со која студентите ќе можат да си го изразат својот глас за студентското организирање.
На референдумот можат да гласаат сите студенти на додипломски и на мастер-студии. На 23 факултети ќе биде обезбедена изборна комисија со избирачки кутии.
Студентите на референдумот треба да се изјаснат дали Студентскиот парламент треба да функционира во рамки на УКИМ и да го изгуби статусот на регистрирана невладина организација.
