Локалната агенција за развој од Струга и „Еуропартнерс дивелопмент“ од Тирана, денеска ги презентираат резултатите од завршната конференција „Сино и зелено наспроти црно и сиво“. Проектот е дел од прекугранична програма на Инструментот за претпристапна помош (ИПА) за Македонија и за Албанија за периодот од 2007 до 2013.
Целта на проектот е да помогне во ефективна и одговорна употреба на природните ресурси во прекуграничното подрачје на Охридско Езеро, подобрувајќи го одржливиот развој на регионот.
Презентацијата ги опфаќа резултатите на проектот и заклучоците од анализата „Интегриран екосистемски пристап за сливот на Охридско Езеро како алатка за зачувување и за заштита на природните ресурси“.
Во неколку работни групи се разговара за можностите за соработка и за еколошките предизвици со кои се соочува регионот околу Охридско Езеро.
Работните групи се тематски – во областа на управување со шуми, води и со почва.
