„Ова е навистина посебен ден“ е почетната реченица од заедничката изјава на турскиот претседател Реџеп Таип Ердоган и грчкиот премиер Кирјакос Мицотакис по историската средба што ја имаа во Атина, пренесува грчката новинска агенција АНА-МПА. Двете земји потпишаа договор за пријателство, се обврзаа да ги обноват врските и потпишаа декларација за добрососедски односи.
„Нашите билатерални односи, исто така, забележаа подеми и падови, што на моменти претставуваше опасна закана за нив, а заедно со нив и за безбедноста и мирот во Источниот Медитеран“, изјави премиерот Мицотакис, нагласувајќи го големото значење на фактот што двете земји го избрале мирниот пат во последните месеци.
Мицотакис истакна дека на нивната средба во Вилнус одлучиле со Ердоган повторно да започнат контакти на три нивоа, тоа на политички дијалог, позитивна агенда и мерки за градење доверба. Двете земји се обврзаа да ги решаваат прашањата како што е поделениот остров Кипар, подморските извори на енергија, но и прашањето за мигрантите.
„Во однос на миграцијата, забележавме значително намалување на протокот во последниот период како резултат на систематската заштита на нашите копнени и поморски граници. Сепак, би додал дека тоа се должи и на подобрената соработка на полицијата, крајбрежната стража и пристанишната полиција на двете земји“, рече Мицотакис.
Грчкиот премиер изјави дека ја поддржува Турција за зачленување во ЕУ и се залага за олеснување на издавањето визи за турските граѓани. Грција веќе побара одобрение од Европската комисија за активирање на можноста турските граѓани да можат да посетат 10 грчки острови во период од седум дена во годината без визи.
Во однос на прашањето за Кипар, Мицотакис истакна дека има несогласување и рече дека не може да има друго решение надвор од резолуциите на Советот за безбедност на ОН, додавајќи дека дијалогот мора да продолжи од точката каде што беше прекинат во 2017 година.
Турскиот претседател Ердоган по средбата изјави дека предложил Советот за соработка на високо ниво помеѓу двете земји да се одржува еднаш годишно. Реџеп Таип Ердоган изјави дека Турција и Грција сакаат Егејското море да го претворат во море на мир и соработка.
Турскиот претседател посвети посебен акцент на економските односи, откривајќи дека се договориле билатералната трговска размена да се зголеми на 10 милијарди долари, од 5 милијарди долари колку што изнесува денес. Тој, исто така, рече дека за време на неговата средба со Мицотакис ја истакнале важноста на транспортните проекти, како што е изградбата на вториот мост на граничниот премин Ипсала-Кипои.
Декларацијата од десет точки, на која дипломатите на Грција и Турција работеле со месеци, се смета за патоказ за зацврстување на поблиски врски по нестабилниот период, во кој за малку беше избегнат воен судир за егејските енергетски ресурси во 2020 година.
