LSDM sot përmes njoftimit akuzoi se portali “Kurir” me ditë të tëra hesht për të ardhurat prej 1,3 milion euro sepse prapa kësaj qëndron ish drejtori i DSK-së, Sasho Mijalkov, kushëriri i kryeministrit Nikolla Gruevski.
Nga partia opozitare thonë se firma pronare e “Kurir”, EM MEDIA SH.P.K –Shkup është e lidhur me kompaninë NVSP, që sipas LSDM-së është themelues i Agjencisë së sigurimit SGS.
“Pas agjencisë së sigurimit SGS qëndron personalisht kushëriri Sasho Mijalkov. Pronari i NVSP, themelues i së cilës është SGS është Vladislav Stajkoviq, Zharko Lukovski, drejtori kryesor dhe ekzekutiv i “T Mobile Maqedoni”. Qytetarët në projektin “E vërteta për Maqedoninë” dëgjuan për lidhshmërinë e kompanisë së Stajkoviq, NSVP me provizionin prej 540 mijë euro që Mijalkov e kërkon për pajisje përgjimi nga Izraeli. Përmes “Kurir”, Gruevski dhe familja kanë zbatuar politikën redaktuese të mediumeve që drejtpërdrejtë janë nën kontrollin e tyre” thuhet në njoftimin e LSDM-së.
