Bashkimi Evropian mund të vendosë sanksione, sikur ndalesë për udhëtime dhe ngrirje të pronës, ndaj disa politikanëve të Maqedonisë që bëjnë obstruksione në procesin e zgjidhjes së krizës, ka deklaruar për “Rojters”, një përfaqësues anonim nga BE-ja.
Sipas burimit të njëjtë, presidenti Gjorge Ivanov, duhet patjetër ta anulojë vendimin për abolimin e 56 politikanëve dhe bashkëpunëtorëve të tyre që janë të përzier në aferën me përgjimet dhe të vazhdojnë bisedimet me BE-në.
“Jemi të shqetësuar, për shkak të shkurtpamsisë së qeverisë aktuale, Maqedonia po shkon në izolim ndërkombëtarë”, paralajmëron një diplomat evropian.
Njëkohësisht “Dojçe Vele”, duke cituar tjetër politikan nga BE, i cili ka kërkuar që të jetë anonim, paralajmëron një hap tjetër të BE-së, marrjen e statusit – vend kandidat për në BE.
“E saktë është. Mendohet për sanksione serioze. Hapi i parë do të jetë marrja e rekomandimit për fillim të negociatave”, thotë burimi.
Javën e kaluar, një përfaqësues i lartë i BE-së për gazetën “The Wall Street Journal” ka deklaruar se nëse presidenti i Maqedonisë, nuk e tërheqë vendimin për faljen e funksionarëve dhe bashkëpunëtorëve të tyre, vendet perëndimore do të sillen më me agresivitet ndaj liderit të VMRO-DPMNE-së, Nikolla Gruevski dhe përfaqësuesve –funksionarë të Maqedonisë.
Si një ndër sanksionet e mundshme mund të jetë edhe ndalimi i udhëtimit në zonën Shengen të BE-së për politikanët e Maqedonisë, tërheqja e ndihmave për krizën e refugjatëve, por edhe ndalimin e mbështetjes për kandidaturën e Maqedonisë në BE dhe NATO – shkruan gazeta “The Wall Street Journal”.