Македонско-грчкиот спор не бил само набрзина спомнат, туку, изненадувачки, бил првата тема на разговорот меѓу шефовите на грчката и на германската дипломатија, Никос Коѕиас и Франк Валтер Штајнмајер. Ова го пренесува весникот „Катимерини“, коментирајќи дека агендата на минатонеделната средба во Берлин била сосема парадоксална и, на големо изненадување, наместо главната тема на агендата да бидат финансиските проблеми и економската криза, министрите се фокусирале првин на спорот за името кој постои меѓу Скопје и Атина.
Според „Катимерини“, Штајнмајер се интересирал зошто сè уште не е постигнато решение, индиректно имлицирајќи дека и Атина е еднакво одговорна како и владата во Скопје што сè уште нема успех во преговорите за името. На строгите германски прашања, Коѕиас посочил дека покрај проблемот со името, за кој најголем дел од грчките политички партии имаат заедничка позиција, односно се согласни на црвените линии за сложено име со географска одредница, постои и голем проблем со иредентизмот од македонската влада.
Двајцата министри се договориле во следниот период подетално и систематски да се разгледа и разговара за спорот за името.
