Собранието денеска не го прифати предлог-законот за амнестија, поднесен од пратениците Павле Трајанов и Лилјана Поповска.
Предлагачите оценија дека власта непотребно шири паника, бидејќи законот предвидува намалување на затворската казна и тоа само за сторителите на полесни криминални дела, како и за криумчарите на мигранти, нешто што сега е легално и го спроведува државата.
– Амнестијата не се однесува на осудени лица со правосилна пресуда на казна затвор повеќе од 10 години или доживотна. Не се однесува за дела убиство, дела против човечноста, против државата, против правата и слободата, силување, обљуба на немоќно лица, полов напад врз малолетни, за посредување при проституција, детска проституција, порнографски материјал за деца, детска порнографија, за кривични дела против бракот и семејствата и младината, за неовластено производство и пуштање во промет наркотични дроги, повеќекратни повторници – рече Трајанов, образложувајќи кои кривични дела нема да бидат опфатени со предлог-законот за амнестија, кој вторпат се најде пред пратениците.
Сепак, владејачката ВМРО-ДПМНЕ смета дека аргументоте на предлагачите се недоволни и оти со донесувањето на законот, 981 криминалец од затворите ќе се најдат на слобода.
