Идејата дека еден ден Русија би можела да ја нападне НАТО е бесмислена и нема никаква основа, изјави рускиот претседател Владимир Путин во интервјуто за италијанскиот весник „Кориере дела сера“.
Тој вели дека Европа не треба да стравува од Русија и додаде оти „можеби некој има интерес да поттикнува такви стравови кај европските граѓани“.
– Можеби САД сакаат да го спречат приближување на Европа и на Русија. Сакам да ви кажам дека не треба да се плашите од Русија – рече Путин.
Рускиот претседател истакна дека официјална Москва ги затворила сите свои бази во странство, освен оние во Таџикистан и во Киргистан, кои за Русија се важни на антитерористички план. Што се однесува до воената база во Ерменија, според Путин, таму руското воено присуство има стабилизирачка улога и не е насочено против никого.
Првиот човек на Русија истакна дека земјата не се однесува агресивно и не се движи кон никаде, за разлика од Алијансата, која се доближува до руската граница.