Родители на деца од Основното училиште „Владислав Рибникар“ во Белград протестираат пред влезот на училиштето, пренесува Н1 Србија. Неколку од нив истуриле, сива боја на коловозот, пребојувајќи го натписот „училиште“, а потоа истуриле и црвена боја.
Н1 пренесува дека присутни се граѓани од сите возрасни групи кои бараат правда за деветте починати деца и чуварот на училиштето кои беа убиени на 3 мај годинава, откако ги застрела ученик од истото училиште.
Родителите велат дека од трагедијата до денес, властите немаат преземено мерки за безбедноста на децата и сè уште не одговараат на апелите на загрижените родители.
Дополнително, Министерството за образование во Србија им препорача на образовните институции да не организираат новогодишни прослави поради жртвите што загинаа во два вооружени напади во земјата годинава.
