Советот на Општина Битола не ја прифати иницијативата на опозициската советничка Габриела Илиевска од ВМРО-НП, спортската сала „Младост“ да се преименува во „Боро Чурлевски“, ракометниот виртуоз кој прерано замина од овој свет.
– Ова беше една скромна иницијатива, поднесена без никаква политичка заднина, за да покажеме дека нашиот град никогаш не ги заборава големите луѓе на Битола. Основа на сè е иницијативата, очигледно дека овде некој не разликува што значи иницијатива – рече Габриела Илиевска, подносителка на иницијативата.
Сепак, на предлогот на опозицијата, советниците од власта возвратија дека за оваа иницијатива треба да се консултира семејството на Чурлевски и спортската јавност во Битола.
– За да ги надминеме партиските конфронтации, сметам дека спортската јавност треба да се произнесе по овој предлог. А сите ние, советници, само да го верифицираме како предлог она што ќе го донесе јавноста. Без никаква политички поени за опозицијата или позицијата – рече Игор Хаџиев , советник од ВМРО-ДПМНЕ.
Понатаму по оваа иницијатива треба да се изјасни Комисијата за млади и спорт во Советот на Општината.
А.Б.