Партијата на европските социјалисти (ПЕС) со зголемена загриженост ги следи последните случувања во Македонија, изјави членот на групата на социјалистите во Европскиот парламент и потпретседател на мешовитата парламентарна комисија ЕУ-Македонија, европратеникот од Бугарија, Сергеј Станишев кој е и претседател на Партијата на европските социјалисти.
– Сè поголемата конфронтација им се заканува на демократските процеси и на довербата во институциите. Повеќепати Европската комисија и ОБСЕ предупредија против закани врз гласачите и недостигот од независност на судството, кое е често партизирано. Во здрава демократска животна средина, опозицијата треба да биде способна да работи во целосна слобода. Обвиненијата имаат јасна политичка мотивација – изјави Станишев за „Мета“.
Станишев не е лично запознаен со снимките од прислушувањето, но истакна дека тоа е неприфатливо.
– Лично не сум запознаен со снимките што беа објавени, но самата можност дека илјадници луѓе биле прислушувани е шокантна и неприфатлива. Понатаму, медиумската слобода е фундаментална за функционална демократија и многу е чудно што изјавите на Заев толку малку беа медиумски покриени. Медиумите можат да се согласат или да не се согласат со некои информации, но нивната главна обврска е да ги информираат луѓето и да имаат гарантирана слобода дека тоа можат да го сторат – рече Станишев.
Станишев најави и мисија на европските социјалисти во Скопје за наредните недели за да се запознаат со ситуација одблиску и да добијат јасна слика за случувањата.
