Поранешниот министер за здравство Беким Сали побара одговорност за виновниците кои ги амнестираат одговорните за пожарот што се случи во тетовската модуларна болница, во која животот го загубија 14 лица.
Тој ја потврди информацијата во документарецот на ИРЛ „Убиство во Тетово“, каде што се објаснува за прекинот на исплата и раскинување на договорот со „Брако“ по направената ревизија од Министерството.
Сали посочи дека и покрај препораките на внатрешната ревизија, неговиот наследник и актуелен министер Меџити преку Владата, иницирал исплата на долгот кон оваа компанија.
Беким Сали од партијата Алтернатива побара одговорност и од шефот на Обвинителството Љубомир Јовевски, кој, како што вели, наместо да му се обрати на виновникот и да бара виновници меѓу оние што ги изградија тие модуларни болници, поднел тужба за споредна одговорност, игнорирајќи ја основната одговорност на фирмата изведувач, на нарачателите и поддржувачите на оваа компанија.
Тој побара оставки од премиерот Димитар Ковачевски и од министерот за здравство Фатмир Меџити, но и да им се извинат за сите овие штети што им ги нанесуваат на граѓаните.
Од Министерството за здравство реагираат на прес-конференцијата на Беким Сали, информирајќи дека токму тој го одобрил приемот на трите изградени амбуланти во Скопје и исплатата за нив.
„Беким Сали крие од јавноста дека со негово одобрение, е направен прием на три амбуланти од страна на министерството, а тоа се модуларните амбуланти во ЗД Бутел, Лисиче и Ѓорче Петров. Лично тој како министер одобрил и ги примил модуларните амбуланти на 23.09.2022, 19.10.2022 и 22.2.2023, со што изведувачот правно требал да ги наплати“, велат од Министерството за здравство, додавајќи дека ги ставаат на увид сите документи, како и одобрението и извештајот од надзорот.
Потоа, Сали цели осум месеци решил спротивно на она што го потпишал, да не плаќа и да остави свесно државата да сноси правни и тешки финансиски последици. Долгот кој во меѓувреме е акумулиран по основ на камати за доцнење е повеќе од 200.000 евра кои ќе треба да ги платат граѓаните, посочуваат од Министерството за здравство.
До овој момент, како што информираше Министерството за здравство, не е исплатено ништо за амбулантите додека Владата не донесе одлука за тоа.
