Пратеникот Алексадар Николоски, како шеф на делегацијата на Собранието на Македонија во Парламенатрното собрание на Советот на Европа, од утре до 12 декември ќе учествува во работата на Мониторинг-комисијата и Комисијата за правни прашања и човекови права.
На состанокот е предвидено да се расправа за исполнувањето на обврските преземни при членство во организацијата од страна на Црна Гора, настаните во Украина, постмониторинг-дијалогот со Монако, а ќе се разгледува и актуелната состојба во Србија, Грузија, Босна и Херцеговина и во Молдавија.
Николоски ќе ги информира членовите на Мониторинг-комисијата и за актуелната состојба во Република Македонија и за активностите на Собранието и на Владата.
Пратеникот ќе учествува и во работата на Комисијата за правни прашања и човекови права, во чии рамки ќе се одржат и неколку тематски расправи, како ефикасноста на Европската конвенција за човекови права, заканите за владеењето на правото во земјите-членки на Советот на Европа, а предвидено е да има и размена на мислења со членови на граѓанското општество на тема „Предизвиците за човековите права во Европа“.