Од денеска почнува пријавувањето за бесплатна вакцинација против сезонски грип за ризичните групи на население, информираше Министерството за здравство.
Пријавувањето се врши на страницата vakcinacija.mk, а вакцинирањето се планира да почне да се спроведува од втората половина на месецов.
Со вакцинацијата ќе бидат опфатени следните ризични групи: стари лица над 65 години, лица со хронични заболувања, здравствени работници, бремени жени, децата на возраст од 6 месеци до 5 години, лицата сместени во установи за социјална заштита на стари лица и лицата вработени во установи за социјална заштита на стари лица.
Со пополнување на апликацијата на овој линк, граѓаните може да се регистрираат за вакцинација директно во системот „Мој Термин“. Согласно распоредот предвиден во планот за вакцинација, граѓаните преку СМС ќе добијат повратна информација за точниот датум, час и место кога треба да се вакцинираат.
Со цел да се обезбеди заштита кај поголем број лица од сезонски грип, Министерството соопшти оти од годинава е зголемена количината на набавени вакцини, односно сега се набавени 60.000 дози четиритипни вакцини против сезонски грип наменети за бесплатна вакцинација.
„Вакцинацијата против сезонски грип е најефикасна мерка за превенција на грип, која спречува појава на потешки форми, компликации и смртен исход особено кај ризичните групи“, велат од Министерството за здравство.
