Се планираат три нови сензорни соби наменети за потребите на корисниците кои се сместени во Специјалниот завод Демир Капија, информираат од Министерството за труд и социјална политика.
Министерката за труд и социјална политика, Јованка Тренчевска денеска се сретна со Сабина Грубенсон, генерален секретар на „Лоза” Фондацијата и Пер Рилов, претседател на управниот одбор на фондацијата „Лоза”. На средбата разговараа за идни проекти кои можат да се реализираат во соработка на Министерството за труд и социјална политика и фондацијата.
Таму беше презентиран планот за донација од фондацијата „Лоза” за три сензорни соби во Специјалниот завод Демир Капија.
„Поддршката на лицата со попреченост се гледа во реализирање на активности кои го унапредуваат нивниот квалитет на живот” изјави министерката Тренчевска.
Таа истакнува дека секој преземен чекор е во насока на подобрување на условите за живот на лицата со попреченост, додавајќи дека деинституционализацијата продолжува да биде приоритет во нејзината работа.
