Имаме одлука за испраќање на помош во опрема и вооружување за Украина согласно нивни побарувања, но земјава нема донесено одлука за испраќање војници, таква одлука нема ни да има, изјави министерката за одбрана Славјанка Петровска за време на одбележувањето на денот на баталјонот на специјални сили на Армијата, додавајќи дека одлуките се носат во НАТО и тие се почитуваат од членките на Алијансата.
Земјава ќе испрати помош во воена опрема, рече министерката додавајќи дека ваквите информации се класифицирани и дека не може да се кажуваат детали.
„Како членка на НАТО земјава ги почитува и спроведува сите одлуки кои се носат во Алијансата во чие донесување и самата учествува. Се приклучивме кон санкциите кои беа изречени од страна на ЕУ, а кои ги поддржаа и други земји кои не се членки. Воената помош е одобрена согласно побарувањето од страна на украинските власти, a заради транспарентност дадовме куса информација дека донесовме одлука за воена помош на Украина согласно капацитетите со кои располагаме”, рече министерката за одбрана.
Капациетот на АРМ не се намалува со оваа донација, која е направена согласно листата на украинските барања.
„Листата што беше испратена е практично испратена до сите сојузници и е многу голема, содржи многу ставки од различен профил. Она на што ние можевме да излеземе во пресрет, излеговме апсолутно“, појасни Петровска.
Во обраќањето пред војниците министерката рече дека со формирањето на Специјалните сили се означи и почеток на професионализација на Армијата која денес е целосно спроведена и секогаш подготвена да биде гаранција на територијалниот интегритет и суверенитет на нашата држава.
