Во општина Центар се отвори втората читална која го носи името на еден од основоположниците на современата македонска книжевност и еден од првите членови на МАНУ, Ацо Шопов. Читалната се наоѓа во трговскиот центар „Беверли хилс“ во Капиштец на првиот кат и има фонд од 2.000 книги од сите жанрови, а зачленувањето е бесплатно.
– Да го зачуваме она што се губи кај нас. Кога се одлучивме да ја отвориме читалната „Славко Јаневски“, најдовме едвај десетина книги од Славко Јаневски. Денес има повеќе од 200 изданија. Тоа е идејата и со втората читална „Ацо Шопов“. Нема многу наслови, но ќе дојдеме до посакуваното ниво – рече градоначалникот на општина Центар, Андреј Жерновски.
Академикот Томе Серафимовски донираше три скулптури – портрети во бронза на Ацо Шопов, Блаже Конески и на Рајко Жинзифов, како и 101 книга.
– Среќен сум што можев и јас да дадам придонес со мојата скромна работа. Засега тоа се три скулптури, но читалната „Ацо Шопов“ ќе има исто толку скулптури колку што има и читалната „Славко Јаневски“. Се надевам дека следната читална ќе го носи името на нашиот „Блаже Конески“ – рече академик Серафимовски.