На платото пред Ректоратот на Универзитетот „Св.Кирил и Методиј“ – Скопје денеска ќе се одржи промотивен настан „Отворен ден – запознајте го УКИМ“.
Ќе бидат поставени штандови на факултетите, а посетителите ќе имаат можност непосредно во разговор со наставниот кадар и со студентите да се запознаат со дејноста на најстарата високообразовна институција во државата, со нејзината долга традиција, мисија и визија.
Настанот е првенствено наменет за средношколците од Македонија, но претставува и можност за сите заинтересирани што сакаат да се информираат околу програмите за постдипломски и за докторски студии.
Во изложбените простори се предвидени разновидни презентации на активностите и на проектите на наставниците и на студентите, изложба на богатата научна дејност на Универзитетот: монографии, учебници, преводи и научни списанија.
Покрај другите активности, предвидена е богата музичка програма, во рамки на која ќе настапат групи од Факултетот за музичка уметност при УКИМ, како и други содржини.
