Министерството за внатрешни работи во Гостивар откри стан кој практично бил претворен во нелегален мобилен оператор, преку кој бил реализиран меѓународен мобилен сообраќај на црно.
Секторот за компјутерски криминал и дигитална форензика – Одделение за истраги за компјутерски криминал, ја реализирал криминалистичката обработка „СИМ-бокс“, поради постоење на основано сомневање за сторено кривично дело злоупотреба на СИМ-картички и незаконско детерминирање на меѓународен мобилен телефонски сообраќај.
На територијата на град Гостивар, по претходно обезбедена судска наредба од судија во претходна постапка, бил извршен претрес на дом и на помошни простории во сопственост на 42-годишно лице од Гостивар, кое во моментот не било присутно. Од извршениот претрес, пронајдена е и одземена софистицирана техничка опрема која се користела за нелегална интерконекција за мобилен (GSM) сообраќај кон голем број странски држави.
Во моментот на претресот, споменатата опремата била во функција и од истата се вршело незаконито детерминирање на меѓународен телефонски сообраќај кон Србија.
„Од првичниот увид на работата на опремата и на генерираните компјутерски податоци, утврдени се повеќе ИП-адреси во Србија, каде овој сообраќај преку интернет нелегално завршува до крајните корисници“, стои во соопштението.
МВР во координација преку центарот ЦЕЛЕК, разменило информации и податоци за локациите со полициските служби во Србија, каде од нивна страна извршен е претрес и исто така пронајдена е техничка опрема која претставува дел од пронајдената опрема во Гостивар и служи за терминиран сообраќај во Србија.
„Имајќи ја предвид намената и функционалноста на пронајдената опрема и огромниот број запленети СИМ-картички, најмногу од српски мобилни оператори, може да се констатира дека голем дел од нивниот меѓународен телефонски сообраќај реализиран преку запленетите СИМ-картички, терминирал низ серверите запленети во Гостивар“, стои во соопштението на МВР.
Од МВР соопштија дека во наредниот период ќе бидат извршени дополнителни проверки за сите инволвирани лица и правни субјекти во нелегалните активности, проверки за начинот на обезбедување на меѓународен сообраќај, негово терминирање и реализација на истиот.
По извршените дополнителни проверки, ќе биде подготвен соодветен поднесок до надлежното јавно обвинителство.