„Новинарски пленум“ за утре во 11 часот најавува протест пред Владата, во знак на револт поради денешниот физички напад на сопственикот на порталот „Мактел“, Саше Ивановски, од вицепремиерот Владимир Пешевски, кој од пленумот го оценуваат како „континуитет на владината стратегија за пресметка со неистомислениците“.
„Вицепремиерот Пешевски, како носител на јавна функција, мора да е свесен дека неговата работа подразбира отчетност и одговорност пред јавноста, која има право да поставува прашања, дури и на теми кои му се чинат непријатни. Ваквиот сериозен испад на Пешевски зборува за неговото ниво на политичка и на општа култура и склоност кон насилно поведение, неспоиви со носител на висока функција во владата, па затоа нужно е тој да понесе политичка и кривична одговорност“, стои во соопштението на „Новинарски пленум“.
Оттаму апелираат „Владата, премиерот и неговата партија да се дистанцираат од овој насилен, антицивилизациски и недмократски акт на Пешевски“.
Од „Новинарски пленум“ ги повикуваат сите колеги и граѓани да се приклучат на утрешниот протест.
