„Либералната партија на Македонија смета дека е рано да се слави и повикува на внимателност во опозициската јавност“, се вели во дел од соопштението на ЛПМ, во кое е сумиран ставот на партијата во врска со договорот за решавање на политичката криза што вчера го постигнаа лидерите на четирите најголеми партии, со посредство на Европската унија и на САД.
Од ЛП во пет точки ги наведуваат своите ставови и забелешки околу договорот, односно протоколот на договорот од 2 јуни.
Оттаму велат дека во протоколот не се опфатени многу важни прашања од кризата, кои се наведени во извештајот на Рајнхард Прибе и дека документот „не се задржува децидно и на оние елементи неопходни за обезбедување демократски и неспорен изборен процес (прочистувањето на избирачкиот список, изборниот модел, пописот)“.
„Во однос на прашањата опфатени во протоколот, очигледни се и одредени недоречености во постапката за остварување на целите на договорот, било оние што се јасно декларирани во текстот, било оние што произлегуваат од самата содржина на договорот и на протоколот. Оттука, Либералната партија смета дека е рано да се слави и повикува на внимателност во опозициската јавност“, стои во соопштението.
Според партијата, „во следниот период практично ќе се види која е вистинската намера на секој од потписниците на договорот и колку таа е во согласност со целите на решавањето на кризата“ и дека на тој начин ќе стане „јасно колку секој од потписниците (и партијата што ја претставува) вистински е решен да води сметка за државните интереси, а колку ќе се влечат потези инспирирани од лични и од теснопартиски мотиви“.
Од ЛП сметаат дека во наредниот период ќе биде „потребен е перманентен надзор на неговото спроведување од страна на гарантите на договорот и на протоколот, а особено од Европската комисија (ЕК)“.
„Ова е потребно за да не се упропасти процесот дизајниран од самиот договор и истиот да не прерасне во уште еден документ со третман на „тоалетна хартија“. Ваквата обврска еднакво се однесува и на сите политички партии, како и на граѓанската јавност и цивилниот сектор во Република Македонија“, се вели во соопштението на либералите.
