Автопатот од грчко-македонската граница кон Солун повторно е блокиран од бегалци. Околу стотина лица го блокираат патот во близина на Поликастро од револт од условите во кои живеат во привремените мигрантски кампови и центри во Идомени и во Кукуш.
Првата блокада бегалците ја поставија вчера, протестирајќи и кај Поликастро и кај преминот Евзони. Од изутринава повторно блокираат со барање да се отворат границите и бидат пуштени кон ЕУ, објаснувајќи дека не можат да го издржат животот во мигрантските кампови и не сакаат да останат во Грција.
Полицијата го има затворено патот и не дозволува возачите да пристапат до бегалците за да не дојде до дополнителна тензија.
Грчките медиуми пренесуваат неофицијални информации дека со бегалците можно е да има и волонтери-поддржувачи, кои им даваат шатори и кои ноќеска ги убедувале да останат и да преспијат на патот и да ги блокираат и двете страни, односно и патот кон границата и насоката кон Солун.
