fbpx

Ниту НАТО е приватна војска, ниту НАТО државите се „окупирани“

Не е точно наведеното во постот дека НАТО е приватна војска на семејството Ротшилд.

-

Не постојат никакви докази дека Џорџ Сорос некогаш изјавил дека „сите држави во НАТО се окупирани“. Напротив, има многу докази дека во повеќе наврати  го изјавувал спротивното, односно зборувал за значењето на НАТО. Не е точно ниту наведеното во постот, дека НАТО е приватна војска на семејството Ротшилд. НАТО е основан во 1949 година како сојуз  на држави од Европа и Северна Америка, формиран на принципот на колективна одбрана, што значи ако еден НАТО сојузник е нападнат, се смета дека се нападнати сите, пишува „Вистиномер“ во својата анализа.

Текстот подолу го пренесуваме во целост:

 

 

Рецензираме пост објавен на социјалната мрежа Фејсбук во кој се вели:

Сите држави кои се во НАТО се „окупирани“!! (Џ. Сорос)

НАТО е приватна војска на кланот Ротшилд а тие пак се банкари на Језуитите (Ватикан)…кој знае, знае.

Толку.

Не постојат никакви докази дека Џорџ Сорос  некогаш изјавил оти „сите држави во НАТО се окупирани“. Од друга страна, пак, има многу докази дека го изјавувал спротивното во повеќе наврати, односно зборувал за значењето на НАТО и негови размислувања за иднината на НАТО.

На пример во 1993 напишал:

Затворените општества базирани на националистички принципи се закана за безбедноста зашто ним им треба непријател, или внатре или надвор. Но, заканата е поинаква од онаа на којашто НАТО беше формиран за да ѝ се спротистави и  потребен е  различен пристап за нејзино спротиставување. Вклучува градење демократски држави и отворени општества и формирајќи ги во структура која почива на одредени однесувања. Конструктивни, отворени општества треба да е мисија на НАТО.

Сорос има посветено многу години од неговиот живот на продемократска работа и е основачот на фондациите Отворено општество, мрежа на фондации и канцеларии во повеќе од 120 држави. Тој има кажано дека инвазијата на Русија врз Украина ја гледа како ултимативен тест за тоа дали демократијата ќе надвладее не само во Украина, туку и во целиот свет.

На самитот во Давос во 2022 година Сорос, меѓу другото,  рече:

Инвазијата на Украина влезе во нова фаза која е многу попредизвикувачка за украинската армија. Мора да се борат на отворен терен каде руската армија е побројна. Украинците го даваат најдоброто од себе, се бранат. САД, исто така, се труди да ја намали финансиската разлика меѓу Русија и Украина со тоа што конгресот алоцира 40 милијарди долари за финансиска и воена помош за Украина. Не можам да го предвидам исходот, ама Украина има борбена шанса. Неодамна европските лидери отидоа чекор подалеку. Сакаа да ја искористат инвазијата на Украина за да промовираат поголема европска интеграција, за тоа што го прави Путин не би можело да се повтори никогаш во иднина.

Тој додаде дека се чини оти Европа се движи во правилна насока, бидејќи одговори на инвазијата врз Украина со голема брзина и напори невидени во историјата, демонстрирајќи силен проевропски глас.

Евидентно е дека Сорос на самитот во Давос во 2022 година зборува и за два система на владеење кои се дијаметрално спротивни:

Инвазијата на Украина не дојде ненадејно, Светот беше зголемено вмешан во битка меѓу два системи на владеење кои се дијаметрално спротивни еден на друг: отворено општество и затворено општество. Да ви ги дефинирам разликите меѓу двата системи наједноставно што можам: Во отворено општество, улогата на државата е да ги заштити слободите на индивидуата. Во затворено општество, улогата на индивидуата е да му е слуга на владетелот на државата.

НАТО и Сорос имаат соработувано, но заеднички и доброволно, а не станува збор за некаква „окупација“.

Во минатото институтот Отворено општество на Сорос и НАТО комбинираа ресурси за заеднички проекти, на пример во Грузија… Лорд Робертсон и господинот Сорос разговараа за идната соработка и за можностите за следни заеднички проекти, напишаа на сајтот на НАТО во 2000 година.

Во извештај од 2007 година од Таџикистан е наведено дека фондацијата Отворено општество соработувала со НАТО и имплементирала школски интернет проект со кој се поврзале 55 училишта со истражувачки институти на една мрежа (страница 91).

НАТО се финансира со директни и индиректни придонеси од своите членки и деталите за финансирањето се јавни.

Не е точно наведеното во постот дека НАТО е приватна војска на семејството Ротшилд. НАТО е формиран во 1949 година, тој е сојуз од 30 држави од Европа и Северна Америка  формиран на принципот на колективна одбрана, што значи дека ако еден НАТО сојузник е нападнат, се смета дека се нападнати сите. На пример, кога терористички напад се случи во САД во 2001, сите НАТО членки застанаа зад Америка како и тие самите да беа нападнати. Оттука, тврдењето дека едно семејство ги има сите овие држави и ги контролира непоткрепено со ниту еден доказ, е теорија на заговор. Особено што НАТО има исклучително транспарентна структура, начин на финансирање како и бројни надворешни партнери. 
Поради сите горенаведени факти, постот што го рецензираме го оценуваме како невистинит.

 

***

Овој напис е изработен во рамките на проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.

Професионални спортисти од девет земји гости на спортските игри во Велес

Од 4 до 8 јуни, Велес ќе биде домаќин на третиот по ред спортски настан „Спортски игри Велес“, кој ќе се одржи во Градскиот парк. Покрај спортисти од Македонија,...