Министерството за внатрешни работи денеска преку соопштение апелираше до опозициската партија ВМРО-ДПМНЕ „да престане да пласира лаги, чија цел е дискредитирање на полицијата“.
„И денеска, преку соопштение пласираат лаги за наводна поврзаност на МВР со бегство на лицето Наим Самиу, иако надлежен за определување мерка притвор е единствено – судот“, велат од МВР.
Отаму им порачуваат на ВМРО-ДПМНЕ, „наместо да шират лаги за МВР, упатувајќи небулозни прашања на погрешна адреса, прашањата да ги упатат до надлежниот суд. А фактите говорат дека полицијата постапи по сѐ што е донесено како одлука од судот“.
Од МВР објаснуваат дека токму по поднесена кривична пријава од страна на СВР Тетово на 16 август 2023 година, на Самиу му бил определен активен притвор, а на 29 септември 2023 година од страна на Основниот суд Тетово мерката активен му е заменета со мерка куќен притвор.
„Покрај ова, ја известуваме јавноста дека против Самиу досега се поднесени 15 кривични пријави за вкупно 30 кривични дела, потоа 4 прекршочни пријави, како и едно писмено известување до ОЈО Тетово“, велат од МВР, посочувајќи дека тоа „уште еден доказ кој ги демантира лагите на ВМРО-ДПМНЕ“.
