Министерот за здравство Фатмир Меџити на денешниот брифинг со новинарите рече дека протестите за случајот со Клиниката за онкологија се злоупотребуваат и апелираше тие да не се користат за дневнo политички цели и за собирање партиски поени, бидејќи можат да го загрозат здравјето на пациентите.
„Луѓето да протестираат е загарантирано право со Уставот на Северна Македонија и мислам дека тоа е најдемократски чин. Секој има право да протестира и јас ги поддржувам ваквите протести, но гледаме со случајот Онкологија дека тоа се злоупотребува“, рече Меџити, додавајќи дека не смее да се остави простор за провлекување на дезинформации и шпекулации, затоа што „над сѐ треба да биде здравјето на пациентите“.
Меџити рече дека е исклучително важно пациентите да имаат доверба во лекарите и дека не треба сите здравствени работници да бидат ставени во ист кош. Тој вети дека ќе биде направено сѐ во однос со случајот со Клиниката за онкологија за да се врати довербата на пациентите во квалитетот на здравствената заштита.
Тој очекува во најбрз можен рок да заврши истрагата и со тоа, како што вели, да се стави крај на неизвесноста. За наводите дека на Клиниката за онкологија доаѓале пациенти од други држави, министерот рече дека во моментов нема информации, но и да има, не може да ги сподели поради предистражната постапка што ја води обвинителството.
„Како никогаш досега ќе има нова пракса за вработените во Министерството за здравство ние сами кога ќе собереме точни информации, јас лично еве ви гарантирам и пред јавноста, како министер ќе одам во обвинителството лично и ќе ја доставам целата документација за можна злоупотреба“, рече Меџити.