Денес во Владата шефот на делегацијата на Европската Унија, Дејвид Гир, го врачи Извештајот на Европската комисија за Република Северна Македонија за 2023 година на заменикот претседател на Владата Бојан Маричиќ.
На состанокот, како што велат од Секретаријатот за европски прашања, се дискутирало за Извештајот, планирањето на следните чекори за реализирање на стратешката цел за приклучување кон ЕУ, планот за раст и реформскиот план за Северна Македонија и Западен Балкан.
Оттаму велат дека ќе следува детална анализа за извештајот од страна на Владата и заложување за продолжување на процесот и успешна реализација на заедничките планови.
„Свесни за предизвиците кои претстојат, наша цел е обезбедување европска иднина на Северна Македонија а со тоа и стабилност, безбедност и просперитет на земјата и на регионот“, велат од СЕП.
На средбата посебно внимание било посветено на следните чекори за Планот за раст (на економиите) на Западниот Балкан.
Европската комисија го усвои Планот за раст на Западен Балкан тежок 6 милијарди евра
„Планот за раст е резултат на наше барање, со што можеме да користиме привилегии и можности од зачленувањето во ЕУ пред време, односно додека траат преговорите. ЕУ со конкретен план подготвува 6 милијарди евра за Западен Балкан, од кои 1 милијарда евра може да ги искористи Северна Македонија. Со Планот за раст се овозможува пристап до европскиот заеднички пазар, што ќе значи силен економски напредок. Тоа значи дека нашите производи и услуги може да се пласираат на „Единствениот европски пазар“, информираат од Секретаријатот за европски прашања.
Целта на ЕУ е до март 2024 година да направи прв трансфер на средства кон Северна Македонија и другите земји во регионот на Западен Балкан.
„Владата и администрацијата мобилизираа значајни ресурси и активно учествуваа во скрининг процесот. Ова не значи дека сме ја завршиле работата. Напротив, скрининг процесот ни ја дава основата за дефинирање на идните реформски приоритети од ЕУ агендата, кои треба да се спроведуваат и за кои неминовно е потребен широк општествен консензус. Во таа насока работиме на подготовка на патоказите за владеење на право, реформите во администрацијата и функционирањето на демократските институции“, велат од СЕП.
На средбата присуствувале министерот за надворешни работи Бујар Османи, државната секретарка на Секретаријатот за Европски прашања Дрита Абдиу Халили и заменикот шеф на делегацијата на ЕУ, Бен Нупнау.
Утре Маричиќ во 11 часот во просториите на Владата ќе одржи прес-конференција со шефот на Делегацијата на Европската Унија во Северна Македонија, Дејвид Гир по повод објавувањето на Извештајот на ЕК за напредокот на земјава.
Судството и владеењето на правото на стаклени нозе во европскиот извештај
