Компанијата „Мајкрософт“ донесе одлука да ја прифати виртуелната валута биткоин, со која отсега ќе можат да се плаќаат разни услуги на оваа компанија. Со биткоин ќе може да се купуваат видеоигри, видеоопрема за конзолата „икс-бокс“, апликации за телефони, како и други софтвери на „Мајкрософт“. Засега, со биткоин ќе можат да плаќаат само во Америка.
Иако „Мајкрософт“ не објави официјално соопштение по повод плаќањето со биткоин, на интернет-страницата каде ги информираат корисниците за начинот на плаќање, од компанијата додале дел во кој се објаснува како нивните услуги можат да се платат со оваа виртуелна валута.
„Мајкрософт“ е последната во низата големи компании која го прифати биткоинот. Пред нив тоа го направија „Пејпал“, „Дел“, „Експедија“, „Њуег“ и други компании.
