Американскиот гигант Мајкрософт најави дека ќе потроши милијарди евра на центри за податоци за вештачка интелигенција во Шпанија, покрај големите инвестициски проекти што ги планира во Германија, пренесува германската новинска агенција ДПА.
Шпанскиот премиер Педро Санчез и менаџерот на Мајкрософт Бред Смит вчера објавија дека ќе бидат инвестирани 1,95 милијарди евра (2,1 милијарди долари) во период од две години. Парите ќе бидат искористени за проширување на инфраструктурата за вештачка интелигенција и т.н. облак (cloud), напиша Смит на онлајн платформата X.
I’m thrilled to announce that we will expand our AI and cloud infrastructure in Spain by $2.1B USD in the next two years. Our investment is beyond just building data centers, it’s a testament to our 37-year commitment to Spain, its security, and development and digital… https://t.co/arJnZzyDpc
— Brad Smith (@BradSmi) February 19, 2024
Минатата недела Смит најави инвестиции од речиси 3,3 милијарди евра во рок од две години за Германија масовно да ги прошири капацитетите на центрите за податоци за апликации за вештачка интелигенција и за т.н. „интернет облак“ (Cloud).
Најголемата поединечна инвестиција во 40-годишната историја на Мајкрософт во Германија вклучува и програма за обука за вештачка интелигенција која има за цел да достигне до 1,2 милиони луѓе.
Минатиот ноември, Мајкрософт веќе вети дека ќе инвестира 2,5 милијарди фунти (3,15 милијарди долари) во вештачка интелигенција во Британија до 2026 година. Еден месец претходно, Смит вети инвестиција од 5 милијарди австралиски долари (3,26 милијарди долари) во секторот за вештачка интелигенција за време на посетата на Австралија.