Во текот на 2022 година завршена била изградбата на 3.844 станови, од кои 3.714 се во индивидуална сопственост, објави Државниот завод за статистика.
Повеќе од половината од становите се во Скопскиот регион (2.107), додека во одредени градови и региони речиси и воопшто да не се градело. Во Полошкиот регион за една година, лани, биле изградени само 87 станови, од кои 67 се во Маврово и Ростуше. Во Тетово завршена била изградбата на само три стана.
Демир Хисар, Крушево, Ресен, Дебар, Кратово, Арачиново, Сарај и Шуто Оризари се дел од општините каде што лани не била завршена изградбата на ниту еден стан.
Во Скопје најмногу станови се завршени во Општина Аеродром – од вкупната бројка на изградени станови во Скопскиот регион, 2.107, само во Аеродром биле изградени 1.120 станови. Потоа следи Гази Баба со 336, 218 во Центар, 175 во Ѓорче Петров, 131 во Бутел, 105 во Карпош и 14 завршени станови во Кисела Вода.
Според Државниот завод за статистика, просечната корисна површина на завршените станови е 66,9 квадратни метри.
