Кривичниот суд Скопје во целост го одобри обвинителниот акт за сообраќајната несреќа што во февруари годинава се случи кај селото Ласкарци, по што е формиран кривично правен предмет, кој преку АКМИС системот ќе биде распределен за натамошно постапување.

Обвинението беше поднесено на 1 јули.

„Во однос на повеќе новинарски прашања за обвинителниот акт КО 778/19 поврзан со сообраќајната несреќа која на 13 февруари 2019 година се случи кај селото Ласкарци, ја информираме јавноста дека советот за оценка на обвинителниот акт по разгледување и ценење на фактите и доказите приложени во актот, донесе решение со кое обвинението го одобри во целост“, соопштија од Судот.

Формиран е кривично – правен предмет со К.бр.1407/19.

Во несреќата кај Ласкарци загинаа 16 лица, а 37 беа потешко повредени.

Основното јавно обвинителство Скопје (ОЈО Скопје) на 1 јули го поднесе обвинителниот акт, со кој ги товари возачот на автобусот, сопственикот, одговорниот за транспорт во фирмата „Дурмо Турс“, како и тројца вработени во станицата за технички преглед, која е во сопственост истиот газда.