Сезоната на Охридското Езеро веќе почна, а со неа доаѓаат и некои грди сцени, кога многу места остануваат затрупани во отпад оставен од капачите. За среќа, Охрид има ентузијасти кои посветуваат време и енергија за крајбрежјето да не се гуши во отпад. Екипата на „Чист Охрид“ викендов вторпат во две седмици одржа акција за чистење од комунален отпад, овој пат на плажата Лабино.
– Посетителите кои во тој момент беа на плажата покажаа свесност и својот отпад уредно го спакуваа и оставија на соодветно место – информираат од „Чист Охрид“.
Велат дека и покрај тврдењата на поединци од ЈП Охридски Комуналец дека непосредно пред акцијата локацијата била исчистена, сепак таму волонтерите затекнале загрижувачка и алармантна состојба.
Во акцијата викендов се собрани 13 вреќи ѓубре и дополнителни работи, како еден целосно изгорен фрижидер, славини од чешми, боја за чевли, четки за тоалетна школка и многу други предмети на кои никако не им е местото на плажа.
Стевчо Маслов од Охридски Комуналец вели дека за жал се чести сцените со купишта отпад, со што се создава грда слика за градот како туристички центар.
– Ги третираме плажите од кои беа отстранети дивоизградените објекти ги чистиме плажите Сараиште, Лабино, Горица 3, Лагадин, Пештани, Трпејца. Секојдневно имаме наши екипи кои ги празнат 120 литарските канти, а го собираат сето она – картони, пластика, хартија – што несовесните граѓани ги оставаат на плажите. Се соочуваме со проблем, максимално работиме, но бараме и соработка од граѓаните – апелира Маслов.