По предлогот на претседателот Стево Пендаровски да се пролонгира рокот за замена на личните документи, кој, согласно Преспанскиот договор, истекува на 12 февруари, премиерот Димитар Ковачевски денеска изјави дека ќе се консултира со двајцата министри со кои разговарал претседателот.
Пендаровски во синоќешното гостување на Телевизија Сител рече дека процесот на промена на личните документи поради промената на уставното име на државата е срамен и претставува „непотребно понижување на македонските граѓани“.
За време на разговорот, претседателот јавно ѝ предложи на Владата рокот за вадење на документите да биде пролонгиран до септември или октомври, за што предлага известување на Грција дека „немаме намера да бегаме од обврските од Преспанскиот договор“.
„Ова го предложив на најмалку двајца министри во македонската влада – со брза интервенција во два закони – Закон за лична карта и Закон за патни исправи, и ако е потребно и Законот за безбедност во патниот сообраќај – тоа се прави во едно попладне, знаеме дека може да се направи во едно попладне, не мора со европско знаменце да биде. Ќе ги измениме тие два закони, ќе го пролонгираме рокот, наместо февруари да биде септември-октомври, претходно ќе ги известиме и Грците дека немаме намера да бегаме од обврските од Преспанскиот договор“, рече претседателот Пендаровски.
Ковачевски, во одговор на новинарско прашање, денеска рече дека е свесен за гужвите и редиците за сликање за нови пасоши и лични документи и најави разгледување на предлогот од претседателот на владина седница. Кажа дека се добредојдени сите предлози со кои може да се унапреди нешто.
„Верувам дека и претседателот може да се слушне со претседателката на Грција. Ќе поразговараме на седница на Влада за можноста да се направи. Претседателот Пендаровски најдобро знае бидејќи беше директно вклучен во подготовката на Преспанскиот договор. Зошто да не?“, изјави премиерот Ковачевски.
Во однос на рокот за промена на личните документи на македонските граѓани, Ковачевски кажа дека истиот не е наметнат од Владата, туку е обврска произлезена од потпишан меѓународен договор кој, како што рече, овозможил да станеме земја членка на НАТО.
„Сепак се работи за законски решенија кои се направени во Собранието. Владата може само да го олесни процесот. МВР отвори поголем број на пунктови и вработени, но ќе треба да се зголеми уште повеќе. Да направите законски измени без согласност на сите кои се потпишани, не би било така едноставно и дали би било применливо“, рече Ковачевски.
